მთავრობის პასუხი უდეში ‘ერთჯერად გაბიონთან’ დაკავშირებით

ადიგენის მუნიციპალიტეტის გამგეობას ის თანხა, რომლითაც უდეში გაბიონი მოეწყო, სტიქიის შედეგების სალიკვიდაციოდ ფინანსთა სამინისტრომ გადაურიცხა.

აღნიშნულ უწყებაში „სამხრეთის კარიბჭეს“ განუცხადეს, რომ იმის მონიტორინგს, თუ რამდენად ეფექტურად დახარჯა გამგეობამ ეს ფული, ფინანსთა სამინისტრო არ აკეთებს.

„ჩვენ მხოლოდ ის შეგვიძლია გადავამოწმოთ, რა თანხა გადაურიცხა სამინისტრომ გამგეობას. ეს საკითხი პირდაპირ უკავშირდება რეგიონული განვითარების სამინისტროს და მუნიციპალიტეტს“, – აცხადებენ ფინანასთა სამინისტროს საზოგადოებასთან ურთიერთობის სამსახურში.

რეგიონული განვითარების სამინისტროში კი ამბობენ, რომ მათ მონიტორინგის უფლება არ აქვთ: „ეს თანხა მუნიციპალიტეტზეა გაპიროვნებული და მუნიციპალიტეტია პასუხისმგებელი. ჩვენ მას ფინანასთა სამინისტროსთან თანხის გადასარიცხად მხოლოდ შუამდგომლობა გავუწეთ. რამდენად ხარისხიანად შესრულდა ადიგენში სამუშაო, ამის გაკონტროლება ჩვენს კომპეტენციაში არ შედის“.

როგორც „საერთაშირისო გამჭვირვალობა – საქართველოში“ გვიხსნიან, აღნიშნული საკითხით დაინტერესება ფინანასთა სამინისტროს კომპეტენციაა, რადგან ამ შემთხვევაში მან მუნიციპალიტეტში თანხის გადარიცხვით დელეგირებული უფლებამოსილება განახორციელა. დელეგირების უფლებამოსილების განმახორციელებელს კი თვითმმართველობის კოდექსის მიხედვით, არამხოლოდ ზედამხედველობის გაწევა შეუძლია, არამედ მეტი კონტროლის უფლებაც აქვს.

„ეს სპეციალური ტრანსფერია, ამიტომ ფინანასთა სამინისტროს შეუძლია მის მიერ გადარიცხული თანხის ხარჯვის ფარგლებში მთლიანად გააკონტროლოს მუნიციპალიტეტის მიერ გამოცემული სამართლებრივი აქტები, მიაწოდოს რეკომენდაციები და ჩაანაცვლოს კიდეც მუნიციპალიტეტი, ანუ გაუუქმოს უფლებამოსილება მუნიციპალიტეტს“, – ამბობს „საერთაშორისო გამჭვირვალობა – საქართველოს“ იურისტი გიგი ჩიხლაძე.

მისი თქმით, ეს ის შემთხვევაა, როცა „ხელის დაბანა“ არ შეიძლება: „აქ მუნიციპალიტეტთან ერთად პასუხისმგებლობა ფინანსთა სამინისტროსაც ევალება“.

შეგახსენებთ, ადიგენში, სოფელ უდეში, მდინარე ქვაბლიანზე 48 998 ლარად ახალი მოწყობილი გაბიონი და გამაგრებული ნაპირის ნაწილი წყალმა წაიღო. მშენებელ კომპანიას, დაზიანებული გაბიონი საგარანტიო ვადაში უნდა გაეკეთებინა, თუმცა ხელმძღვანელი აცხადებს, რომ გაბიონს რამდენჯერაც გამოურეცხავს ძირს წყალი, იმდენჯერ უნდა ჩაწვეს წყალში და ეს ერთჯერადი პროექტი იყო.

[თამუნა უჩიძე, ადიგენი]