ადიგენში, მოშლილი გაბიონი ისევ გასაკეთებელია

ადიგენის მუნიციპალიტეტის გამგეობაში აცხადებენ, რომ შპს „ლოდი +“ მოშლილი გაბიონის გასაკეთებლად სამუშაოებს მალე დაიწყებს.

„გუშინ ვიყავით ერთად ჩასული, არ სჯეროდათ, რომ იქ გაბიონი მართლაც მოშლილი იყო, ვაჩვენე, ფოტოები გადავიღეთ და დაიწყებენ გაკეთებას“, – ამბობს ადიგენში ინფრასტრუქტურის სამსახურის უფროსი გოდერძი სხრიტალძე.

თუმცა, მანამდე კომპანიაში, რომელსაც საგარანტიო ვადით, მოშლილი გაბიონის გაკეთება ევალებოდა, აცხადებდნენ, რომ წყლის დონის დაკლებას ელოდნენ.

„წესით მაგას მე არ უნდა ვაკეთებდე, სტიქიაა, წყალი ადიდდა და დააზიანა. მიუხედავად მაგისა, იმ გაბიონმა თავისი საქმე მაინც გააკეთა, ხალხის ნაკვეთები არ დატბორა. რა დამიჯდება რა მნიშვნელობ აქვს, ვაპირებ გაკეთებას“, – ამბობს შპს „ლოდი +“ის ხელმძღვანელი გიორგი ორჯონიკიძე.

შეგახსენებთ, ადიგენში, სოფელ უდეში, მდინარე ქვაბლიანზე 99 000 ლარად ახალი მოწყობილი გაბიონი და გამაგრებული ნაპირის ნაწილი წყალმა წაიღო. მოსახლეობას ნაკვეთების დატბორვის ეშინია.

[თამუნა უჩიძე, ადიგენი]