შსს: წყალდიდობის შედეგად ადიგენში არავინ დაშავებულა

როგორც აღნიშნულ უწყებაში აცხადებენ, სტიქიას მსხვერპლი არ მოჰყოლია: „არც არავინ დაშავებულა. რამდენიმე ჯგუფი ერთადაა მობილიზებული და მუშაობენ“.

მათი ინფორმაციით, ამ წუთებში, ადიგენის მუნიციპალიტეტის სოფელ ვარხანში სამაშველო სამსახურის წარმომადგენლები საცხოვრებელი სახლებიდან წყალს ტუმბავენ.

ადიგენის მუნიციპალიტეტის გამგეობის საზოგადოებასთან ურთიერთობის სამსახურში აცხადებენ, რომ სოფელ ვარხანში დაახლოებით ათი სახლია დატბორილი: „ჩვენი წარმომადგენლები ადგილზე არიან“.

სოფელ ბენარის მცხოვრების სვეტა ბოჩიკაშვილის თქმით, ძლიერი წვიმა დაახლოებით 20 წუთს გაგრძელდა: „მერე უცებ დიდი წყალი მოვარდა. ნათესი აღარაფერი დაგვიტოვა, აბსოლუტურად ყველაფერი წყალმა წაიღო. 5 000 ლარის ზარალი მაინც ვნახე. ასეა სოფელში ყველა, არცერთ გლეხს აღარაფერი დაუტოვა. ვინ მოგვაქცევს ყურადღებას?! ჯერ ჩვენ სოფელში არავინ გამოჩენილა“.

შეგახსენებთ, დღეს 29 მაისს, ძლიერმა წვიმამ დააზარალა ადიგენის სოფლები: აბასთუმანი, ვარხანი, უნწა, ქიქინეთი, წახანი და ბენარა. შედარებით ნაკლებად, თუმცა, წვიმამ დააზარალა არალი და უდეც. ადიდებულმა მდინარე ოცხემ და ღელეებმა, დატბორა გზები, სახნავ–სათესი ფართობები და საცხოვრებელი სახლები. სოფელ ვარხანში წყალმა წაიღო რამდენიმე მცხოვრების საქონლის სადგომი. დაღუპულია შინაური პირუტყვი.

ადგილზე იმყოფება „სამხრეთის კარიბჭე“, თვალი ადევნეთ ვებ–გვერდს.

[თამუნა უჩიძე, ადიგენი]