უდეში მოშლილი გაბიონის გასაკეთებლად მშენებელს ორ თვეზე მეტია ელოდებიან

ადიგენის მუნიციპალიტეტის სოფელ უდეში გაბიონი შპს „ლოდი +“მა გააკეთა და მას სარაგანტიო ვადა ჯერ არ ამოწურვია. ამიტომ სწორედ ისაა ვალდებული მოშლილი გაბიონი აღადგინოს.

კომპანის ხელმძღვანელმა გიორგი ორჯონიკიძემ „სამხრეთის კარიბჭესთან“ სატელეფონო საუბარში 15 ივლისს განაცხადა, რომ გაბიონის გასაკეთებლად მზად იყო, ოღნდ წყლის დონის დაკლებას ელოდებოდა. ახლა კი აცხადებს, რომ გაბიონი აღადგინა, თუმცა წყალმა ისევ მოარღვია.

ადიგენის მუნიციპალიტეტის გამგეობაში კი აცხადებენ, რომ კომპანიას საგარანტიო ვადით ნაკისრი ვალდებულებები არ შესრულებია და მათ წარმომადგენლებს უდეში ამ დრომდე ელიან.

„29 ივლისს მივწერე, რომ არ ჩამოვიდნენ, გასულ კვირას კიდევ ერთხელ გავუგზავნე წერილი, გუშინ პირადად ვესაუბრე ტელეფონზე და დამპირდნენ, რომ აღდგენას დაიწყებენ“, – ამბობს ადიგენის მუნიციპალიტეტის გამგეობის ინფრასტრუქტურის სამსახურის ხელმძღვანელი გოდერძი სხირტლაძე.

მისი თქმით, თუ მშენებელი კომპანია საგარანტიო ვადაში გაბიონს არ გააკეთებს, რეაგირებისთვის საქმეს შესაბამის ორგანოებს გადასცემენ.

შეგახსენებთ, ადიგენში, სოფელ უდეში, მდინარე ქვაბლიანზე 99 000 ლარად ახალი მოწყობილი გაბიონი და გამაგრებული ნაპირის ნაწილი წყალმა წაიღო. მოსახლეობას ნაკვეთების დატბორვის ეშინია.

[თამუნა უჩიძე, ადიგენი]