ასპინძაში პრეზიდენტის გადადგომის მოთხოვნით ხელმოწერების შეგროვება გრძელდება

საქართველოს პრეზიდენტის გადადგომის მოთხოვნით ხელმოწორებს არასამთავრობო ორგანიზაცია ”ერთსულოვნება საზოგადოების უფლებებისათვის” აგროვებს. ორგანიზაციის წარმომადგენლები ამბობენ, რომ ხელმოწერის მსურველი ბევრია. ამ დროისთვის კი დაახლოებით 5 000-ზე მეტი ხელმოწერაა შეგროვებული.

შეგახსენებთ, რომ აღნიშნულმა ორგანიზაციამ ასპინძაში კარავი 14 დეკემბერს დადგა. 12 დღის შემდეგ კი ასპინძის ადმინისტრაციული შენობის მიმდებარე ტერიტრიაზე, ოფისში გადაინაცვლა. ასევე ხელმოწერების შეგროვების პარალელურად მიმდინარეობს მოქალაქეთა რეგისტრაცია, რომლებიც 20 იანვარს საქართველოს დედაქალაქში დაგეგმილ საპროტესტო აქციაზე აპირებენ წასვლას.

- ”ჩვენი ხარჯებით მივდივართ, არავის ძალით წაყვანას არ ვაპირებთ, როგორც ამას ”წარმავალი” ხელისუფლება აკეთებდა. აქციაზე წამოსვლის სურვილი ძალიან ბევრმა გამოთქვა და ჩვენ ერთად გადავაყენებთ სააკაშვილს”, -აცხადებს არასამთავრობო ორგანიზაციის წევრი უშანგი მელიქიძე.

შეგახსენებთ, რომ პრეზიდენტის რეზიდენციასთან, მისი გადადგომის მოთხოვნით, არასამთავრობო ორგანიზაცია”ერთსულოვნება საზოგადოების უფლებებისათვის” 20 იანვარს ფართომასშტაბიან საპროტესტო აქციას გამართავს.



[თინათინ ზაზაძე, ასპინძა]