პრეზიდენტის გადადგომის მოთხოვნით ხელმოწერებს ასპინძაშიც აგროვებენ

არასამთავრობო ორგანიზაციის ”ერთსულოვნება საზოგადოების უფლებებისათვის” ასპინძის ოფისის ხელმძღვანელი გოჩა პარუნაშვილი ამბობს, რომ ამ დროისთვის მუნიციპალიტეტის მასშტაბით, 3000-ზე მეტი ხელმოწერა შეგროვდა.

არასამთავრობო ორგანიზაციამ ”ერთსულოვნება საზოგადოების უფლებებისათვის” კარავი ასპინძაში 14 დეკემბერს დადგა.

”კარავი მანამდე იდგება, ვიდრე პრეზიდენტს არ გადავაყენებთ”,- ამბობს გოჩა პარუნაშვილი.

არასამთავრობო ორგანიზაციის წარმომადგენლები ამბობენ, რომ ხელმოწერის მსურველი ძალიან ბევრია.

ასპინძაში გამოკითხული 15 მოქალქიდან, თხუთმეტივემ გვითხრა, რომ პრეზიდენტის გადადგომის მომხრეა. თუმცა, ბევრმა მათგანმა ვინაობის გამხელაზე უარი განგვიცხადა.

”პრეზიდენტი თვითონ უნდა მიხვდეს და გადადგეს, მაგრამ გუშინ განვითარებული მოვლენების შემდეგ, მიხვედრის არაფერი ემჩნევა. თუ არ გადადგა, კარგი არაფერი მოხდება,ა სე შესაძლებელია სამოქალაქო ომამდე მივიდეთ”, - გვითხრა ასპინძელმა ია თაქთაქიძემ.

”უნდა გადადგეს, ხალხის არჩეულია და ხალხს უნდა დაემორჩილოს. თუ მოსახლეობის 50-მა პროცენტმა გადაწყვიტა მისი გადადგომა, უნდა წავიდეს.დასრულდეს ორხელისუფლებიანობა, წინააღმდეგ შემთხვევაში კატასტროფულ შედეგებამდე მივალთ”, - გვითხრა შუახნის მამაკაცმა.

შეგახსენებთ, რომ სამცხე-ჯავახეთი პირველი რეგიონია, სადაც პრეზიდენტის გადადგომის მოთხოვნით ხელმოწერების შესაგროვებლად აღნიშნულმა ორგანიზაციამ კარავი დასცა. პირველი კარავი ახალციხეში დაიდგა.

[თინათინ ზაზაძე, ასპინძა]