პრეზიდენტის გადადგომის მოთხოვნით ხელმოწერები კარავში გროვდება

კარავი ქალქის ცენტრში, სამცხე-ჯავახეთის ადმინისტრაციული შენობის მიმდებარედ, შოთა რუსთაველის ძეგლთან დაიდგა. მოქალაქეებს ხელმოწერის დაფიქსირება მხოლოდ პირადობის მოწმობის დამადასტურებელი დოკუმენტის წარდგენის შემდეგ შეუძლიათ.

’ერთსულოვნება საზოგადოების უფლებებისათვის’ ახალციხის ორაგანიზაციის თავმჯდომარის გუჯა ბიჭაშვილის განმარტებით, ამ ტერიტორიაზე კარავი დაახლოებით ორი კვირის განმავლობაში იქნება გაშლილი. პარალელურად, ხელმოწერების შეგროვება კარდაკარის პრინციპითაც გაგრძელდება.

- ’კარდაკარის პრინციპით ხელმოწერების შეგროვება რამდენიმე დღეა დავიწყეთ. დაახლოებით რვაასი ხელმოწერა უკვე შეგროვებული გვაქვს. თუმცა ეს მხოლოდ ახალციხის მცირე ნაწილში. ჩვენი მიზანია, მივიცვათ მთელი რეგიონი’, - განმარტავს ბიჭაშვილი.


’ერთსულოვნება საზოგადოების უფლებებისათვის’ ორგანიზაციის თავმჯდომარე მიხეილ ანდღულაძე განმარტავს, რომ ორგანიზაცია რეგიონებში ფართომასშტაბიან ღონისძიებებს ახალციხიდან იწყებს: ’დღეს რეალობაა, რომ სახელმწიფოში ორხელისუფლიანობაა; რეალობაა, რომ ის ხელისუფლება რომელიც იქნა არჩეული ხალხის მიერ, შეზღუდულია და ხელისშემშლელი პირობები აქვს მრავალი სხვა რეგიონული უწყებების მხრიდან. უნდა დამკვიდრდეს ერთხელისუფლებიანობა. საქართველომ აირჩია ერთი ხელისუფალი და მეორე ხელისუფალი არ სჭირდება’.

6 დეკემბერს ორგანიზაცია გამაფრთხილებელ ბრიფინგს გამართავს, რის საშუალებითაც საქართველოს პრეზიდენტს ინფორმაციას მიაწვდიან იმის შესახებ, რომ მისი გადადგომის მოთხოვნით ხელმოწერები გროვდება.

ხელმოწერების შეგროვება 4 იანვარს შეწყდება. ამის შემდეგ აღნიშნული ორგანიზაცია პეტიციასა და ხელმოწერებს პრეზიდენტს გადასცემს.



- ’ამასთანავე, ამ ინფორმაციას ვაცნობებთ საქართველოში აკრედიტებულ ყველა საელჩოს და პირადად მივმართავთ ყველა ქვეყნის მმართველებს, გაგვიწიონ მხარდაჭერა ერის ნების დამკვიდრებაში’, - აცხადებს ანდღულაძე.

[თამარ თოთაძე, ახალციხე]