”ერთსულოვნებამ” დაგეგმილი აქცია გადადო

ორგანიზაცია ქუთაისში, პარლამენტის შენობასთან საპროტესტო აქციის გამართვას, ხვალ, 14:00 საათზე აპირებდა. ”ერთსულოვნება საზოგადოების უფლებებისათვის” ახალციხის რაიონულ ორგანიზაციაში ამბობენ, რომ საქართველოს პარლამენტთან დაგეგმილ აქციას მოსახლეობა მთელი საქართველოდან უნდა შეერთებოდა. ხვალ დილით ახალციხიდან ქუთაისის მიმართულებით ათობით მანქანის გასვლას გეგმავდნენ.

- ”მიხეილ სააკაშვილს გასული აქვს უფლებამოსილების ვადა და უფლება არ აქვს პარლამენტში პრეზიდენტის სახელით გამოვიდეს”, - გვითხრა არასამთავრობო ორგანიზაცია ”ერთსულოვნება საზოგადოების უფლებებისათვის” ახალციხის რაიონული ორგანიზაციის თავმჯდომარემ ელგუჯა ბიჭაშვილმა.

საქართველოს პარლამენტის შენობასთან დაგეგმილ აქციას უნდა შეერთებოდა ასპინძის მუნიციპალიტეტის მოსახლეობაც. როგორც ორგანიაზციის ასპინძის ორგანიზაციის თავმჯდომარე გოჩა პარუნაშვილი ამბობს, რომ ასპინძიდან აქციაზე გასამგზავრებლად დაახლოებით 150 ადამიანი ემზადებოდა.

შეგახსენებთ, რომ საქართველოს პარლამენტის წინაშე ხვალ საქართველოს პრეზიდენტი ყოველწლიური ანგარიშით უნდა წარდგენილიყო. თუმცა, დღეს დილით, ბიუროს სხდომაზე, პარლამენტის თავმჯდომარემ დავით უსუფაშვილმა განაცხადა, რომ უმრავლესობის ინიციატივით პრეზიდენტის გამოსვლა გადაიდო.

დაგეგმილი აქციაც ცხადია გადადო ”ერთსულოვნებამ”. ელგუჯა ბიჭაშვილი ამბობს, რომ ახლა ცენტრალური ოფისიდან დირექტივებს ელოდებიან.

შეგახსნებთ, რომ არასამთავრობო ორგანიზაცია ”ერთსულოვნება საზოგადოების უფლებებისათვის” პრეზიდენტის გადადგომის მოთხოვნით მთელი საქართველოს მასშტაბით ხელმოწერებს აგროვებს. ამ ეტაპზე ახალციხის მუნიციპალიტეტში 9500 ხელმოწერაა შეგროვებული, ასპინძაში კი 4000-მდე.

[თამარ თოთაძე, ახალციხე]