პრეზიდენტის გადადგომის მოთხოვნით ხელმოწერების შეგროვება გრძელდება [Video]

არასამთავრობო ორგანიზაცია ”ერთსულოვნება საზოგადოების უფლებებისთვის” ხელმოწერების შეგროვებას ქალაქში მოძრავი კარვითა და კარდაკარ შემოვლით კვლავ აგრძელებს.

”ერთსულოვნება საზოგადოების უფლებებისთვის” ახალციხის რეგიონული ოფისის ხელმძღვანელის ელგუჯა ბიჭაშვილის თქმით, ამ დროისთვის ახალციხის მუნიციპალიტეტში 5 000-მდე ხელმოწერა შეგროვდა.

ხვალ სამცხე-ჯავახეთის ექვსივე მუნიციპალიტეტიდან პრეზიდენტის გადადგომის მოთხოვნით ქუთაისის მიმართულებით კოლონა გავა. რაიონული ორგანიზაციები, რომლებსაც ახალციხის ოფისი გაუძღვება, ხაშურში თბილისიდან მომავალ კოლონას შეურთდებიან.

”ჩავალთ ჯერ ქუთაისში, შემდეგ ბათუმში და შევხვდებით იმ ადამიანებს, რომლებიც ქვეყანაში ორხელისუფლებიანობისა და პრეზიდენტის გადადგომის მომხრეები არიან”, - ამბობს ბიჭაშვილი.

ტურნე 25 დეკემბერს ბათუმში დასრულდება. ამასობაში მუნიციპალიტეტებში აღნიშნული ორგანიზაციის აქტივისტები ხელმოწერების შეგროვებას კვლავ გააგრძელებენ. ეს პროცესი 3 იანვარს დასრულდება.

”ოთხში შევიკრიბებით პრეზიდენტის სასახლესთან და ვეტყვით მას, რომ უნდა წავიდეს”, - გვითხრა ბიჭაშვილმა.





[თამუნა უჩიძე, თინათინ ზაზაძე, ახალციხე]