პრეზიდენტის გადადგომის მოთხოვნით ახალციხეში 1850 ხელმოწერა შეგროვდა

ხელმოწერებს არასამთავრობო ორგანიზაცია ”ერთსულოვნება საზოგადოების უფლებებისათვის” აგროვებს. ახალციხეში ამ პროცესს კოალიცია ”ქართული ოცნების” წევრი და ამავდროულად ”ერთსულოვნება საზოგადოების უფლებებისათვის” ხელმძღვანელი ელგუჯა ბიჭაშვილი ხელმძღვანელობს.

ორგანიზაციაში ამბობენ, რომ ამ დროისთვის 1850 ხელმოწერაა შეგროვებული. მათივე თქმით, რაოდენობა გაიზრდება, რადგან ხელმოწერებს კარდაკარის პრინციპითაც აგროვებენ.

კურორტ აბასთუმანში, ასევე, ადიგენის, ახალციხისა და ასპინძის მუნიციპალიტეტებში ხელმოწრებს 28 კოორდინატორი აგროვებს.

- ’მინდა გითხრათ, რომ საზოგადოებაში შიშის სინდრომი კიდევ დარჩა და ზოგი ხელმოწერაზე უარს გვეუბნება. მაგრამ, დიდი ნაწილი ხელმოწერას სიამოვნებით თანხმდება. 4-ში ყველა ერთად ვეტყვით მიშას, რომ წავიდეს”, - განაცხადა ’ერთსულოვნება საზოგადოების უფლებებისათვის’ ხელმძღვანელმა ელგუჯა ბიჭაშვილმა.

შეგახსენებთ, რომ საქართველოს პრეზიდენტის გადადგომის მოთხოვნით ახალციხეში ხელმოწერებს 4 დეკემბრიდან აგროვებენ. ქალაქის ცენტრში, სამხარეო ადმინისტრაციის შენობასთან ხელმოწერის მსურველებისთვის ისევ დგას კარავიც.

[თინათინ ზაზაძე, ახალციხე]