დღეს ახალციხეში სოზარ სუბარს ელოდებიან

სოზარ სუბარი არასამთავრობო ორგანიზაციებისა და ადგილობრივი თვითმმართველობის წარმომადგენლებსა და დაინტერესებულ პირებს სამცხე–ჯავახეთის სამხარეო ადმინისტრაციაში შეხვდება. შეხვედრა 12:00 საათზეა დაგეგმილი.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო 2015 წლიდან, სახელმწიფო ბიუჯეტის დაფინანსებით, სამშობლოში დაბრუნებული საქართველოს მოქალაქეების რეინტეგრაციის მხარდაჭერას ახორციელებს. წინა წელთან შედარებით, დაფინანსება 200 000 ლარით გაიზარდა და ამ ეტაპზე 600 000 ლარს შეადგენს. სამინისტრო აღნიშნულ პროგრამას არასამთავრობო ორგანიზაციების მეშვეობით ახორციელებს .

წელს 2016 წლის პროგრამის საგრანტო კონკურსის გამარჯვებული ორგანიზაცია ა(ა)იპ სამცხე-ჯავახეთის რეგიონულ ასოციაცია „ტოლერანტია“.

„ტოლერანტი“ პროექტს სამცხე–ჯავახეთსა და ქვემო ქართლში განახორციელებს, პროექტი 10 თვის განმავლობაში გაგრძელდება.

„საქართველოში დაბრუნებულ მიგრანტთა სარეინტეგრაციო დახმარების“ 2016 წლის სახელმწიფო პროგრამა დაბრუნებულ მიგრანტებს შემდეგი სახის სერვისებს სთავაზობს:

• სამედიცინო მომსახურებისა და მედიკამენტების დაფინანსება, მათ შორის ფსიქო-სოციალური რეაბილიტაცია;

• შემოსავლის წყაროს გაჩენისა და თვითდასაქმების ხელშეწყობის მიზნით სოციალური პროექტების დაფინანსება;

• დაბრუნებისთანავე, საჭიროების შემთხვევაში, დროებითი საცხოვრისით უზრუნველყოფა;

• იურიდიული დახმარება;

• სსიპ სოციალური მომსახურების სააგენტოს სამუშაოს მაძიებელთა პროფესიული მომზადება-გადამზადების და კვალიფიკაციის ამაღლების პროგრამაში ბენეფიციართა ჩართვის ხელშეწყობა.

პროგრამა ასევე ითვალისწინებს, დაბრუნებული მიგრანტების რეინტეგრაციის მხარდასაჭერად სახელმწიფოს მიერ განხორციელებული და დაგეგმილი საქმიანობის შესახებ საზოგადოების და დაინტერესებული მხარეების დროულ და ზუსტ ინფორმირებას.

[sknews.ge]