ლტოლვილთა სამინისტროს საგრანტო კონკურსი არასამთავრობოებისთვის

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ინფორმაციით, გრანტი გაიცემა საქართველოში დაბრუნებული მიგრანტებისთვის გადაუდებელი სამედიცინო დახმარების, მედიკამენტებით უზრუნველყოფის, კვალიფიკაციის ამაღლების, ანაზღაურებადი სტაჟირებების ხელშეწყობისა და სოციალური პროექტების დაფინანსების მიზნით.

„საგრანტო პროგრამის მიზანია, ხელი შეუწყოს ერთი მხრივ სამშობლოში დაბრუნებული საქართველოს მოქალაქეების ღირსეული რეინტეგრაციის პროცესს და მეორე მხრივ, ამავე მიმართულებით, არასამთავრობო სექტორის განვითარებას და გაძლიერებას“, – აცხადებენ სამინისტროში.
სამინისტროს მიერ გასაცემი თანხის მოცულობა შეადგენს 340 000 ლარს, რომლის ფარგლებშიც გაიცემა 12 გრანტი.

სამინისტროში განმარტავენ, რომ საგრანტო განაცხადებს განიხილავს და შეჯიბრებითობის, გამჭვირვალობისა და დამოუკიდებლობის პრინციპების დაცვით გამარჯვებულებს გამოავლენს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მიერ შექმნილი კომისია, რომლის წევრებსაც სამინისტროსა და საერთაშორისო ორგანიზაციების წევრები წარმოადგენენ.

საგრანტო კონკურსისა და საგრანტო პროგრამების შესახებ დეტალური ინფორმაცია განთავსებულია სამინისტროს ოფიციალურ ვებ-გვერდზე www.mra.gov.ge და სამინისტროს Facebook (https://www.facebook.com/devniltasaministro) გვერდზე.



[sknews.ge]