ლტოლვილთა სამინისტრომ საგრანტო კონკურსი არასამთავრობოებს გააცნო

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილეებმა გრიგოლ გიორგაძემ და მამუკა ცოტნიაშვილმა ახალციხეში, რუსთაველის N113 – ში მდებარე ყოფილი სკოლა – ინტერნატის შენობის სარეაბილიტაციო სამუშაოები სამცხე – ჯავახეთის გუბერნატორის მოადგილესთან ავთანდილ კაჭკაჭიშვილთან ერთად დაათვალიერეს.

როგორც გრიგოლ გიორგაძემ განმარტა, დევნილები ახალციხეში საცხოვრებელი ფართით ერთ თვეში დაკმაყოფილდებიან: „დაახლოებით ერთ თვეში დასრულდება წყალ–კანალიზაციისა და კომუნიკაციების მიერთების სამუშაოები, რის შემდეგაც დავიწყებთ ბინების განაწილების პროცესს“.

კითხვაზე, რატომ ვერ დასრულდა შენობის რეაბილიტაცია დასახელებულ ვადაში, მინისტრის მოადგილემ განმარტა, რომ ვადები სამშენებლო კომპანიის მიზეზით გადაიწია: „კომაპნიას რომელმაც ობიექტის ჩაბარების ვადები გადააცილა, ბუნებრივია საჯარიმო სანქციები დაეკისრება. გარდა ამისა, სხვა ობიექტური პრობლემებიც არსებობდა. აღნიშნულ შენობაში ცხოვრობდნენ სოციალურად დაუცველი ოჯახები, რომლებიც აფერხებდნენ სამუშაოებს“.

სამცხე – ჯავახეთის გუბერნატორის მოადგილის ავთანდილ კაჭკაჭაშვილის თქმით, რეგიონში მცხოვრები დევნილები საცხოვრებელი ფართით სრულად დაკმაყოფილდებიან: „როგორც ჩვენი, ისე სამინისტროს ინფორმაციით, ბინებით თითქმის ყველა დევნილი დაკმაყოფილდება“.

დევნილებისთვის განკუთვნილ შენობაში 66 ბინაა, 13 ერთოთახიანი, 32 ოროთახიანი და 21 სამოთახიანი. ობიექტის რეაბილიტაცია ტენდერში გამარჯვებულმა კომპანიამ შპს „სენმა“ განახორციელა. სამუშაოების ღირებულებამ 763 983 ლარი შეადგინა.

სარეაბილიტაციო სამუშაოების დათვალიერების შემდეგ სამინისტროს წარმომადგენლები დემოკრატიული ჩართულობის ცენტრში არასამთავრობო ორგანიზაციის წარმომადგენლებს შეხვდნენ და მათ „საქართველოში დაბრუნებული მიგრანტების სარეინტეგრაციო დახმარების“ საგრანტო პროგრამის შესახებ დეტალური ინფორმაცია მიაწოდეს.

„გადავწყვიტეთ, რომ სახელმწიფოს ბიუჯეტით გამოყოფილი თანხა, რომელიც ხელს შეუწყობს სამშობლოში დაბრუნებულ მიგრანტთა რეინტეგრაციას, არასამთავრობო ორგანიზაციებს სხვადასხვა გრანტების საშუალებით გადავცეთ“, – ამბობს გრიგოლ გიორგაძე.

დაბრუნებული მიგრანტების სარეინტეგრაციო მხარდაჭერის საგრანტო პროგრამა გულისხმობს არასამთავრობო სექტორის წარმომადგენლებისთვის გრანტის გაცემას საქართველოში დაბრუნებული მიგრანტებისთვის გადაუდებელი სამედიცინო დახმარების დაფინანსების და მედიკამენტებით უზრუნველყოფის, პროფესიული სწავლებისა და ანაზღაურებადი სტაჟირებების ხელშეწყობის და სოციალური პროექტების დაფინანსების მიზნით.


„ძალიან კარგია, რომ მიგრანტების საკითხი ერთ – ერთი პრიორიტეტია ჩვენი ქვეყნისთვის, რადგან ისინი ძალიან დიდი პრობლემის წინაშე დგანან. ეს საგრანტო კონკურსი ხელს შეუწყობს არასამთავრობო და სამთავრობო ორგანიზაციების მჭიდრო თანამშრომლობას“, – ამბობს არასამთავრობო ორგანიზაცია ახალგაზრდული ცენტრის დირექტორი ნარინე გინოსიანი.

[მანანა სარაშვილი, ახალციხე]