დახმარების სახელმწიფო პროგრამა მიგრანტებისთვის

პროექტის სამიზნე რეგიონებია სამცხე–ჯავახეთი და შიდა ქართლი.

პროგრამის განმახორციელებელი არასამთავრობო ორგანიზაციებია: სამცხე–ჯავახეთის რეგიონული ორგანოიზაცია „ტოლერანტი“ და შიდა–ქართლის „კეთილდღეობისა და განვითარების ცენტრი“.

პროექტის მიზანია, სამცხე-ჯავახეთსა და შიდა-ქართლში დაბრუნებული მიგრანტების რეინტეგრაციის წარმატების უზრუნველსაყოფად, ისეთი სერვისებით მომსახურება, რომელიც მათ დაეხმარება დაბრუნების შემდგომ წარმოშობილი სირთულეების გადალახვაში. ასევე, უზრუნველყოფს პროექტის ბენეფიციარების მხრიდან საზღვარგარეთ არალეგალურად განმეორებით წასვლის პრევენციას.

პროექტში მონაწილეობა შეუძლია საქართველოში დაბრუნებულ მიგრანტს, რომელიც აკმაყოფილებს შემდეგ მოთხოვნებს:

– არის საქართველოს მოქალაქე ან მოქალაქეობის არმქონე პირი, რომელსაც გააჩნია საქართველოში ბინადრობის უფლება;
– საზღვარგარეთ იმყოფებოდა არალეგალურად, ან საზღვარგარეთ ჰქონდა განაცხადი თავშესაფარზე, ან სარგებლობდა დროებითი ჰუმანიტარული სტატუსით;
– საზღვარგარეთ ყოფნის პერიოდი, ბოლო დაბრუნებამდე, იყო ერთი წელი და მეტი;
– მობილურობის ცენტრს ან გრანტის განმახორციელებელ ორგანიზაციას რეგისტრაციისათვის მომართა საქართველოში დაბრუნებიდან ერთი წლის განმავლობაში.

„საქართველოში დაბრუნებულ მიგრანტთა სარეინტეგრაციო დახმარების“ პროგრამით გათვალისწინებულია სამშობლოში დაბრუნებული მიგრანტებისთვის სამედიცინო მომსახურების და მედიკამენტების დაფინანსება, სოციალური პროექტების დაფინანსება, სსიპ სოციალური მომსახურების სააგენტოს სამუშაოს მაძიებელთა პროფესიული მომზადება-გადამზადების და კვალიფიკაციის ამაღლების პროგრამაში ბენეფიციართა ჩართვის ხელშეწყობა.

პროექტის განხორციელების ვადა ათი თვეა და ბიუჯეტი მოიცავს 96 250 ლარს.

პრეზენტაციას ადგილობრივი თვითმმართველობის, არასამთავრობო სექტორის, მედიის წარმომადგენლები და პროგრამის ბენეფიციარებიც ესწრებოდნენ.

2015 წლიდან სამშობლოში დაბრუნებული მიგრანტების რეინტეგრაციის მხარდასაჭერად თანხა სახელმწიფო ბიუჯეტიდან გამოიყოფა.

[გულო კოხოძე, ახალციხე]