რა დახმარებას მიიღებენ საქართველოში დაბრუნებული მიგრანტები

სახელმწიფო პროგრამის პრეზენტაციას ახალციხეში, სამცხე–ჯავახეთის მასშტაბით მუნიციპალიტეტების პირველი პირები, სამხარეო ადმინისტრაციისა და არასამთავრობო ორგანიზაციების წარმომადგენლები დაესწრნენ.

„საქართველოში დაბრუნებულ მიგრანტთა სარეინტეგრაციო დახმარების“ პროგრამას ლტოლვილთა და განსახლების სამინისტრო არასამთავრობო ორგანიზაციებთან ერთად ახორციელებს. მის ფარგლებში, სხვადასხვა ქვეყნიდან საქართველოში დაბრუნებულ მიგრანტებს სახელმწიფო რამდენიმე მიმართულებით დახმარებას სთავაზობს.

2016 წელს სახელმწიფო სარეინტეგრაციო პროგრამა შემდეგ კომპონენტებს მოიცავს:

• სამედიცინო მომსახურება და მედიკამენტების დაფინანსება, მათ შორის ფსიქოლოგიურ–სოციალური რეაბილიტაცია 1000 ლარის ფარგლებში;

• სოციალური პროექტების დაფინანსება მცირე ბიზნესის დაწყებისათვის, 4 000 ლარის ფარგლებში;

• საჭიროების შემთხვევაში დროებითი საცხოვრისით უზრუნველყოფა;

• იურიდიული დახმარება – კონსულტაცია სამართლებრივ საკითხებზე, წარმომადგენლობის გაწევა შესაბამის ორგანოებში, ფასიანი სახელმწიფო მომსახურების ანაზღაურება და სხვა. დაფინანსება 500 ლარის ფარგლებში;

• პროფესიული მომზადება-გადამზადების და კვალიფიკაციის ამაღლების პროგრამაში ბენეფიციარების ჩართვის ხელშეწყობა.
ლტოლვილთა და განსახლების მინისტრის, სოზარ სუბარის განმარტებით, პროგრამა შესაძლებლობას აძლევს მიგრანტებს, რომ მათ საკუთარ სამშობლოში უკეთ ცხოვრება შეძლონ.

,,არიან ადამიანები, რომლებმაც მსოფლიოს სხვადასხვა ქვეყნებში, შეძლეს საკუთარი ცხოვრების მოწყობა, მაგრამ ბევრი მათგანი ამას ვერ ახერხებს. უცხო ქვეყანაში როცა მიდიხარ, გაქვს ენის ბარიერი, მოშორებული ხარ ოჯახს, არ არის ადვილი ცხოვრების აწყობა“, – ამბობს სუბარი და ამატებს, რომ თუ სახელმწიფო მიგრანტებს დაეხმარება, ბევრი მათგანი ამ შანსს გამოიყენებს და ოჯახს დაუბრუნდება.

მიგრანტთა ხელშეწყობის პროექტს, სამინისტროსთან ერთად, სამცხე–ჯავახეთში ასოციაცია ,,ტოლერანტი“ ახორციელებს. როგორც მისი ხელმძღვანელი ცირა მესხიშვილი ამბობს, პროექტის ფარგლებში მისი ორგანიზაცია შიდა ქართლშიც იმუშავებს. სახელმწიფო პროგრამაში ჩართვისათვის მიგრანტთა დარეგისტრირება ერთი თვის წინ დაიწყო.

,,იანვრში გამოცხადდა კონკურსი, ჩვენი ერთთვიანი მუშაობის შედეგია ის, რომ ამ ორი რეგიონიდან უკვე 11 ადამიანია დარეგისტრირებული. დაახლოებით 10–მა ბიზნეს კონსულტაციები მიიღო და და ახლა პროექტებს ამზადებს. ორმა სამედიცინო ერთმა კი ფსიქოლოგიური კონსულტაციები გაიარა“ – განმარტავს ასოციაცია ,,ტოლერანტის“ ხელმძღვანელი ცირა მესხიშვილი.

„საქართველოში დაბრუნებულ მიგრანტთა სარეინტეგრაციო დახმარების“ პროგრამა სახელმწიფო ბიუჯეტიდან ფინანსდება. 2015 წელს მისი ბიუჯეტი 400 000 ლარს შეადგენდა. მის ფარგლებში, სხვადასხვა სახის მომსახურება 165–მა დაბრუნებულმა მიგრანტმა მიიღო. 2016 წლისათვის დაფინანსებამ 600 000 ლარი შეადგინა.

იმისათვის, რომ საქართველოში დაბრუნებული მიგრანტი პროგრამაში ჩაერთოს, იგი რამდენიმე კრიტერიუმს უნდა აკმაყოფილებდეს.

,,დასარეგისტრირებლად მნიშვნელოვანია, რომ პირი იყოს საქართველოს მოქალაქე და ერთ წელზე მეტი ვადით სხვა ქვეყანაში ცხოვრობდეს არალეგალურად, ან თავშესაფარი ჰქონდეს მოთხოვნილი. გარდა ამისა, მისი საქართველოში დაბრუნებიდან არ უნდა იყოს გასული ერთი წელი. დასარეგისტრირებლად შეუძლიათ პირდაპირ მოვიდნენ სამინისტროში, დარეკონ ცხელ ხაზზე ან მიაკოთხონ ჩვენს რეგიონულ წარმომადგენლობებს: გორში, ქუთაისში, ზუგდიდში, ან პროგრამაში ჩართულ არასამთვარობო ორგანიზაციებს დაუკავშირდნენ “ – განმარტავს მიგრაციისა და რეპატრიაციის სამმართველოს უფროსი რუსუდან ასათიანი.

[თაკო ფეიქრიშვილი, ახალციხე]