9 ივნისს ახალციხეს დევნილთა და განსახლების მინისტრის მოადგილე გრიგოლ გიორგაძე ესტუმრება

სამცხე–ჯავახეთის ადმინსიტრაციულ შენობაში „საქართველოში დაბრუნებულ მიგრანტთა სარეინტეგრაციო დახმარების“ პროგრამის პრეზენტაცია 11:00 საათზე დაიწყება. სამინისტროს თანამშრომლების გარდა შეხვედრას არასამთავრობო ორგანიზაციების საქართველოს დემოგრაფიული აღორძინების ფონდისა და მიგრაციის, ინტეგრაციისა და განვითარების საერთაშორისო გაერთიანების (MIDE) წარმომადგენლები დაესწრებიან.

შეხვედრაზე მოწვეული არიან სამხარეო ადმინისტრაციის, ადგილობრივი მუნიციპალიტეტების ხელმძღვანელები, საკრებულოს თავმჯდომარეები და მაჟორიტარი დეპუტატები, ასევე ადგილობრივი და საერთაშორისო ორგანიზაციების წარმომადგენლები.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დაბრუნებულ მიგრანტთა სარეინტეგრაციო მხარდაჭერას 2011 წლიდან ევროკავშირის დაფინანსებით ახორციელებს, ხოლო პირველად 2015 წელს, სახელმწიფო ბიუჯეტში გამოიყო თანხა 400 000 ლარის ოდენობით, რომლის ფარგლებშიც სამინისტრო საქართველოში მოქმედი არასამთავრობო ორგანიზაციების მეშვეობით განახორციელებს სამშობლოში დაბრუნებულ მიგრანტთა სარეინტეგრაციო დახმარების პროგრამას.

პროგრამის მიზანია, ერთი მხრივ დაბრუნებულ მიგრანტთა სამშობლოში ღირსეული რეინტეგრაციის ხელშეწყობა, მეორე მხრივ კი ამ მიმართულებით არასამთავრობო ორგანიზაციების საქმიანობის გაძლიერება. აღნიშნული პროგრამა მოიცავს შემდეგი სახის სერვისებს:

• სამედიცინო დახმარება და მედიკამენტებით უზრუნველყოფა, ასევე ფსიქო-სოციალური რეაბილიტაცია;
• პროფესიული სწავლება;
• სოციალური პროექტების დაფინანსება;
• ანაზღაურებადი სტაჟირება;
• იურიდიული დახმარება.

[sknews.ge]