რას სთავაზობს სახელმწიფო სამშობლოში დაბრუნებულ მიგრანტებს

შეხვედრა სამცხე–ჯავახეთის სამხარეო ადმინისტრაციაში შედგა. „საქართველოში დაბრუნებულ მიგრანტთა სარეინტეგრაციო დახმარების“ პროგრამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველმა მოადგილემ გრიგოლ გიორგაძემ სამინისტროს თანამშრომლებთან ერთად ისაუბრა.

„ჩვენ კოორდინირებულად უნდა ვიმუშაოთ, რათა მუნიციპალიტეტებმა იცოდნენ კონკრეტული პრობლემის შემთხვევაში სად გადაამისამართონ მოქალაქე“, – განაცხადა გრიგოლ გიორგაძემ.

„როდესაც რამდენიმე წელი მოწყვეტილი ხარ ქვეყანას, ძნელია რეინტეგრაცია. ქვეყანა ვითარდება, სულ სხვა წესი და კანონებია ცხოვრების, ამიტომ არის საჭირო ასეთი პროექტები“, – ამბობს ასპინძის მუნიციპალიტეტის გამგებელი ლევან ცაბაძე.

დაბრუნებულ მიგრანტთა სარეინტეგრაციო მხარდაჭერას სამინისტრო 2011 წლიდან ევროკავშირის დაფინანსებით ახორციელებს. წელს, პირველად, სახელმწიფო ბიუჯეტში გამოიყო თანხა 400 000 ლარის ოდენობით, რომლის ფარგლებშიც სამინისტრო საქართველოში მოქმედი არასამთავრობო ორგანიზაციების მეშვეობით განახორციელებს სამშობლოში დაბრუნებულ მიგრანტთა სარეინტეგრაციო დახმარების პროგრამას.

პროგრამის მიზანია, ერთი მხრივ დაბრუნებულ მიგრანტთა სამშობლოში ღირსეული რეინტეგრაციის ხელშეწყობა, მეორე მხრივ კი ამ მიმართულებით არასამთავრობო ორგანიზაციების საქმიანობის გაძლიერება. აღნიშნული პროგრამა მოიცავს შემდეგი სახის სერვისებს: სამედიცინო დახმარება და მედიკამენტებით უზრუნველყოფა, ასევე ფსიქო-სოციალური რეაბილიტაცია; პროფესიული სწავლება; სოციალური პროექტების დაფინანსება; ანაზღაურებადი სტაჟირება; იურიდიული დახმარება.

გრიგოლ გიორგაძის განმარტებით სამცხე–ჯავახეთის რეგიონში ორი არასამთავრობო ორგანიზაცია ოპერირებს: საქართველოს დემოგრაფიული აღორძინების ფონდი და მიგრაციის, ინტეგრაციისა და განვითარების საერთაშორისო გაერთიანება (MIDE). მოქალაქეები მათთან მუნიციპალიტეტებმა უნდა გადაამისამართონ.



[თინათინ ზაზაძე, ახალციხე]