საგრანტო კონკურსი მიგრანტების რეინტეგრაციისათვის

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს წარმომადგენლები სამცხე–ჯავახეთში მოქმედ არასამთავრობო ორგანიზაციის თანამშრომლებს დღეს, 16 მარტს შეხვდნენ.

„ჩვენი მიზანია, 7 მარტს გამოცხადებული საგრანტო კონკურსის შესახებ მათ ინფორმაცია მივაწოდოთ, კონკურსი კი ქვეყანაში დაბრუნებული მიგრანტების რეინტეგრაციის ხელშეწყობას გულისხმობს“, – ამბობს მიგრაციის რეპატრიაციისა და ლტოლვილთა საკითხების დეპარტამენტის წარმომადგენელი რუსუდან ასათიანი.

სხვადასხვა სახის სერვისებისთვის სამცხე–ჯავახეთში სამინისტრო 106.500 ლარს დახარჯავს. სულ პროექტის ფარლგებში 600.000 ლარია გათვალისწინებული. გასულ წელს ამავე მიზნით 400.000 დაიხარჯა.

„დაბრუნებულ მიგრანტებს სჭირდებათ მედიკამენტები, პროფესიული გადამზადება და სხვადასხვა პროგრამებში ჩართვა, ბიზნეს პროექტების დაფინანსება, იურიდიული დახმარება. ეს ყველაფერი მათ უნდა გავუკეთოთ, ოღონდ არასამთავრობო სექტორის ეფექტური ჩართვით. ამიტომ ვთავაზობთ მათ კონკურსში მონაწილეობას“, – ამბობს ასათიანი.

ასოციაცია „ტოლერანტის“ ხელმძღვანელის ცირა მესხიშვილის განცხადებით, გასულ წელს გამოცხადებული კონკურსის დროს, სამცხე–ჯავახეთში გრანტი არ გაცემულა: „ნებისმიერ არასამთავრობო ორგანიზაციას შეუძლია მიიღოს ამ კონკურსში მონაწილეობა და შესთავაზოს სერვისები“.

საგრანტო კონკურსი დაიწყო 7 მარტს და 21 მარტს 18:00 საათზე დასრულდება. დეტალური ინფორმაცია განთავსებულია სამინისტროს ოფიციალურ ვებ-გვერდზე www.mra.gov.ge.

[თამუნა უჩიძე, ახალციხე]