შეწყვეტილი რეაბილიტაცია

თამარაშვილის ქუჩაზე ხუთ სართულიან საცხოვრებელ სახლს ხარაჩოები საპარლამენტო არჩევნებამდე ცოტა ხნით ადრე მიადგეს. აქვე დაგეგმილი იყო რვასართულიანი კორპუსის რეაბილიტაციაც. თუმცა, აღნიშნულ კორპუსებს სარეაბილიტაციო სამუშაოები დღემდე არ ჩასტარებია.

”ხარაჩოები გასული წლის სექტემბრის შუა რიცხვებში დავდგით, ახლა მიგვაქვს, რომ დავასაწყობოთ,რადგან ჩვენი კომპანია აღნიშნულ სამუშაოებს აღარ ასრულებს”, -გვითხრა კომპანია ”არქიტექსის” წარმომადგენელმა რომან გიქოშვილმა.

ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილი განმარტავს, რომ აღნიშნულ კორპუსთან ერთად დაგეგმილი იყო რვასართულიანი შენობის რეაბილიტაციაც. კერძოდ: გარე ფასადების შეღებვა, სახურავის გამოცვლა და სადარბაზოების გარემონტება. ამ შენობებს გასულ წელს მხოლოდ სახურავები შეუცვალეს.

„არჩევნების წინ დაიწყეს და არჩევნების შემდეგ რატომღაც შეწყდა მუშაობა. ახლა იმიტომ ხსნიან ხარაჩოებს, რომ ეს იმ კომპანიის კერძო საკუთრებაა, რომელიც მაშინ აწარმოებდა სამუშოებს”, - ამბობს ბესიკ ხითარიშვილი.

მისივე თქმით, აღნიშნული პროექტისთვის 2012 წლის ბიუჯეტიდან 660 ათასი ლარი იყო გამოყოფილი. თუმცა, იმის გამო რომ სამუშაოები არ შესრულებულა, აღნიშნული თანხა არც დახარჯულა. სწორედ ამ თანხით აპირებს ახალი გამგებელი შეწყვეტილი რეაბილიტაციის დასრულებას.

„წელს უშუალოდ გამგეობის პრეროგატივაა გადაწყვიტოს ეს სამუშაოები აღდგეს თუ არა. რადგან ჩემი დიდი სურვილია, რომ ამ შენობების რეაბილიტაცია მოხდეს, ტენდერს თავიდან გამოვაცხადებთ და სარეაბილიტაცო სამუშაოებს გამარჯვებული კომპანია დაასრულებს“, - განმარტავს გამგებლის მოვალეობის შემსრულებელი.

კონკრეტულად როდის დასრულდება თამარაშვილის ქუჩაზე ხუთ და რვასართულიანი შენობების რეაბილიტაცია, ხითარიშვილი ვერ აკონკრეტებს: „მზადდება შესაბამისი პროექტი, როგორც კი დასრულდება, კომისიას წარვუდგენთ განსახილველად, რის შემდეგაც ხელახალი ტენდერი გამოცხადდება“.



[თამარ თოთაძე, ახალციხე]