სამცხე–ჯავახეთში შშმ პირების მშობლებმა NGO დააარსეს

ახალდაარსებულ ორგანიზაციაში ამბობენ, რომ მათი მიზანი სამცხე-ჯავახეთში მცხოვრები შშმ პირების ფიზიკური, ფსიქიკური, სოციალური და მორალური მდგომარეობის გაუმჯობესება და საზოგადოებაში მათი ინტეგრაციაა.

„ჩვენი გეგმაა ჩვენს შვილებს შევუქმნათ ისეთი პირობები, რომ დამოუკიდებლად, ჩვენს გარეშეც შეძლონ ცხოვრება“, - ამბობს ორგანიზაციის ერთ–ერთი დამფუძნებელი ვეფხვია დიაკონაშვილი.

მიზნების მიღწევას ორგანიზაციაში ყველა საჭირო უწყებასთან კომუნიკაციით, პრობლემების ადვოკატირებით ფიქრობენ. ამბობენ, რომ შეეცდებიან გრანტების მოპოვებას.

„გვინდა მოვიპოვოთ გრანტები და მთელი თანხა მივმართოთ პრობლემების მოსაგვარებლად“, - აღნიშნეს ორგანიზაციის დამფუძნებლებმა.
ორგანიზაციის პრეზენტაცია დღეს, 9 ივნისს, ახალციხის დემოკრატიული ჩართულობის ცენტრში შედგა. შეხვედრას სხვადასხვა არასამთავრობო ორგანიზაციების წარმომადგენლები ესწრებოდნენ. ღონისძიებაზე მიწვეული იყვნენ ადგილობრივი ხელისუფლების წარმომადგენლებიც, თუმცა არავინ დასწრებია.

„შშმ პირების მშობლებმა პირველი ნაბიჯი უკვე გადადგეს და მხარდამჭერების მოძიება დაიწყეს. ისინი მოტივირებული არიან და იმედი მაქვს, რომ შედეგსაც მიაღწევენ“, – ამბობს ასოციაცია „ტოლერანტის“ ხელმძღვანელი ცირა მესხიშვილი.

ორგანიზაცია „თანადგომა შვილებს“ სამცხე-ჯავახეთის მასშტაბით იფუნქციონირებს. ამ ეტაპზე იგი 80-მდე შეზღუდული შესაძლებლობების მქონე პირის მშობელსა და 100-მდე ბენეფიციარს აერთიანებს.



[ლუბა გიორგაძე, ახალციხე]