შშმ პირების მსვლელობა პროტესტის ნიშნად

14 ივნისს საქართველოში შეზღუდული შესაძლებლობის მქონე პირთა უფლებების დაცვის დღე აღინიშნება. ამ დღესთან დაკავშირებით ღონისძიება ახალციხეშიც გაიმართა. არასამთავრობო ორგანიზაცია „ყველა ყველასათვის“ მიერ ორგანიზებული აქცია ახალციხის ცენტრალურ პარკში, დღის 15:00 საათზე დაიწყო.

„ყველა ყველასათვის“ შეზღუდული შესაძლებლობის მქონე პირთა უფლებების დაცვის კუთხით მუშაობს.

„საზოგადოებაში უამრავი სტერეოტიპია გაბატონებული და გვინდა, რომ ამ სტერეოტიპების წინააღმდეგ ვიბრძოლოთ. ასევე ვიბრძოლოთ შეზღუდული შესაძლებლობის მქონე პირთა ადაპტაციისთვის, ინტეგრაციისა და ხელმისაწვდომი გარემოს შექმნისთვის“, - ამბობს არასამთავრობო ორგანიზაცია „ყველა ყველასათვის“ აღმასრულებელი დირექტორი შორენა გაბოშვილი.



ღონისძიების მხარდამჭერი ადგილობრივი ტელეკომპანია „მეცხრე არხი“ იყო.

„აბსოლიტურად ვეთანხმებით იმ მოსაზრებას, რომ საჭიროა უკეთ გავიცნოთ ერთმანეთი, ასევე აუცილებელია ნებისმიერ საქმეში, ვისაც რა ფორმით შეგვიძლია, ერთად ჩავერთოდ და ერთად ვაკეთოთ საქმე“, - ამბობს ადგილობრივი ტელეკომპანია „მეცხრე არხის“ დირექტორი მაია იველაშვილი.

ორგანიზაციის წარმომადგენლები ამბობენ, რომ ქალაქი შეზღუდული შესაძლებლობის მქონე პირებისთვის ადაპტირებული არ არის.

„აქცია იმისთვის მოეწყო, რომ ყველას დავანახოთ, რამდენად საჭიროა შშმ პირების ადაპტაცია. არის ისეთი პანდუსები, რომლითაც ვერსად გადაადგილდები. მაგალითად, ადმინისტრაციულ შენობასთან მხოლოდ ასასვლელია, ტოტუარიდან ჩამოსასვლელი აღარაა“, - ამბობს არასამთავრობო ორგანიზაცია „ყველ ყველასათვის“ თავმჯდომარე გელა ბარძიმაძე.


[თამარ თოთაძე, ახალციხე]