‘შშმ პირების უფლებების დაცვა’ – დისკუსია დემოკრატიული ჩართულობის ცენტრში [Video]

შეხვედრა დემოკრატიული ჩართულობის ცენტრში შედგა. დისკუსიას პროექტში ჩართული პირების გარდა, არასამთავრობო ორგანიზაციების წევრები, შშმ პირები, მესხ ქალთა გაერთიანების წევრები და ადგილობრივი ხელისუფლების წარმომადგენლები ესწრებოდნენ.

როგორც ორგანიზატორები განმარტავენ, შეხვედრის მიზანი შეზღუდული შესაძლებლობების მქონე პირთა საჭიროებებისა და მათ მიმართ საზოგადოების დამოკიდებულებაზე საზოგადოების დაფიქრება იყო.

დისკუსია „ტოლერანტის“ პროექტის: „ვიცხოვროთ, ვიმუშაოთ, ვიმოქმედოთ ერთად“ ფარგლებში მომზადებული მონიტორინგის შედეგების გაცნობით დაიწყო.

„ჩვენ გვაქვს ძალიან მკვეთრი მონიტორინგის შედეგები, ამიტომ მკაცრად უნდა მოვთხოვოთ ბიზნეს სექტორის და ხელისუფლების წარმომადგენლებს, რომ ქალაქი გადაეწყოს შშმ პირების მისაღებად“, – განაცხადა ასოციაცია „ტოლერანტის“ ხელმძღვანელმა ცირა მესხიშვილმა.

პრეზენტაციის დასრულების შემდეგ, იმ პირებს, ვინც საკუთარი მაღაზიების წინ შშმ პირებისთვის პანდუსები მოაწყეს, ასოციაციისგან სიმბოლური საჩუქრები გადაეცათ.

„საინტერესო შეხვედრა იყო, ვფიქრობ, რომ ის პრობლემები, რომლებიც ამ ადმამიანებს აწუხებს, ყველამ ერთად უნდა მოვაგვაროთ, როგორც ადგილობრივმა ხელისუფლებამ ისე თითოეულმა მოქალაქემ“, – განაცხადა შეხვედრის დასრულების შემდეგ ქალაქ ახალციხის მუნიციპალიტეტის საკრებულოს თავმჯდომარის მოვალეობის დროებით შემსრულებელმა თამარ გოგოლაძემ.



[ვარლამ წიკლაური, ახალციხე]