უნივერსიტეტის პრეს-კლუბში შშმ პირების პრობლემებზე იმსჯელეს

უნივერსიტეტის პრეს-კლუბის წევრებმა სტუმრად არასამთავრობო ორგანიზაცია ”ყველა ყველასათვის” მოიწვია. აღნიშნული ორგანიზაცია შეზღუდული შესაძლებლობის მქონე პირების პრობლემებზე მუშაობს. ორგანაზაციის წარმომადგენლებმა და პრეს-კლუბის წევრებმა იმ საკითხებზე იმსჯელეს, თუ რა პრობლემების წინაშე დგანან შშმ პირები და როგორ შეიძლება მოგვარდეს მათი პრობლემები.

”ჩვენ ხელმისაწვდომი გარემოს აუცილებლობაზე ვისაუბრეთ. ეს დიდი პრობლემაა და ვგეგმავთ ქმედითი აქციებით პროპაგანდა გავუწიოთ ამ პრობლემას. ვცდილობთ, რაიმე შევცვალოთ მათ ცხოვრებაში”, - ამბობს არასამთავრობო ორგანიზაცია ”ყველა ყველასათვის” აღმასრულებელი დირექტორი შორენა გაბოშვილი.

ამავე ორგანიზაციის თავმჯდომარე შშმ პირის გელა ბარძიმაძის თქმით, უნივერსიტეტის სტუდენტებთან შეხვედრა მათთვის ძალიან მნიშვნელოვანია.

”გვინდა მათ ვუთხრათ, რომ ჩვენც ჩვეულებრივი ადამიანები ვართ. მსგავსი შეხვედრები აუცილებლად უნდა გაგრძელდეს, რადგან ეს ხელს შეუწყობს შშმ პირების საზოგადოებაში ინტეგრაციას”.

სტუდენტები ამბობენ, რომ ამ ადამიანებს აუცილებლად დაუდგებიან გვერდში.

”ჩვენ კარგად გვესმის მათი. ეს ადამიანები ჩვენს თანადგომას ყოველთვის იგრძნობენ”, - ამბობს პრეს-კლუბის წარმომადგენელი, ჟურნალისტიკის სპეციალობის მესამე კურსის სტუდენტი ნეკო მდივანი.

[ნინო ზედგინიძე, ახალციხე]