შშმ პირები გაერთიანების ჩამოყალიბებას აპირებენ

შეხვედრა ორგანიზაციის ”ხელმისაწვდომი გარემო ყველასთვის” ინიციატივით გაიმართა. მას ახალციხეში მცხოვრები შეზღუდული შესაძლებლობების მქონე პირები ესწრებოდნენ. შეხვედრის მიზანი შშმ პირების პრობლემების გამოკვეთა და ამ პირთა გაერთიანების ჩამოყალიბება იყო.

- ”გვინდა დავეხმაროთ ადგილობრივ შეზღუდული შესაძლებლობების მქონე პირებს, რომ ჩამოაყალიბონ თავიანთი ორგანიზაცია. რაც უფრო ძლიერი იქნება ასეთი ტიპის რეგიონული ორგანიზაციები, მით უფრო ადვილად შევძლებთ პრობლემების მოგვარებას”, - განაცხადა ორგანიზაციის თავჯდომარემ გიორგი ახმეტელმა.

შეზღუდული შესაძლებლობების მქონე პირები ქალაქში გადაადგილების პრობლემეზე საუბრობდნენ.

- ”ქალაქში ძნელია გადაადგილება, ბორდიულზე ასვლა შეუძლებელია, ზომები არ არის დაცული, ზოგი მაღალია ზოგი კი დაბალი”, - ამბობს გელა ბარძიმაძე და ამატებს, რომ მსგავსი შეხვედრები მათ საზოგადოებაში ინტეგრაციას უწყობს ხელს.

ორგანიზაცია ”ხელმისაწვდომი გარემო ყველასათვის” წელიწად ნახევარია რაც ფუნქციონირებს. მასში შეზღუდული შესაძლებლობების მქონე მოქალქეები არიან გაწევრიანებული. ორგანიზაციის მიზანი შეზღუდული შესაძლებლობების მქონე პირთა საზოგადოებაში ინტეგრაციაა.

შეხვედრის მეორე ნაწილში ”ახალციხის დემოკრატიული ჩრთულობის” ცენტრის ინიციატივით ამავე თემაზე დისკუსია მოეწყო. დისკუსიას სამცხე-ჯავახეთის ინკლუზიური განათლების კოორდინატორი ნინო ნადირაძე უძღვებოდა.

შეხვედრაზე ფილმა ”კედელი” აჩვენეს. დასასრულს კი ორგანიზაციამ ”ხელმისაწვდომი გარემო ყველასათვის” მონაწილეებს საინფორმაციო ბიულეტინები დაურიგა.

[ნინო ბერიძე, ახალციხე]