შშმ პირთა მშობლების ინიციატივით ახალციხეში სასწავლო კურსები იხსნება

სასწავლო ცენტრმა ,,ბიზნეს სისტემა“, ახალციხეში საგანმანათლებლო პროგრამების პრეზენტაცია გამართა. ცენტრისა და ადგილობრივების შეხვედრა შშმ პირთა მშობლების მიერ დაარსებულმა ორგანიზაციამ – ,,თანადგომა შვილებს“ – მოაწყო.

საგანმანათლებლო პროგრამების პრეზენტაცია ახალციხეში ცეტრის გენერალურმა დირექტორმა ნატო მამარდაშვილმა გააკეთა. მისი თქმით, რეგიონში სასწავლო კურსების დაწყება დგილობრივ არასამათვარობო ორგანზიაციასთან ერთად გადაწყვიტეს: „მათი მხარდაჭერით მოსახლეობა სხვადასხვა პროგრამების შესწავლას სიმბოლურ ფასად, 60 ლარად შეძლებს“.

ცენტრი მიღებას რამდენიმე სასწავლო პროგრამაზე გამოაცხადებს: ბუღალტერია, ბიზნესის მართვა–ადმინისტრირება, მენეჯმენტი, საბანკო საქმე; ფსიქოლოგია; ფარმაცია; მასაჟი, სტილისტი, ვიზაჟი, კოსმეტოლოგია; უცხო ენები, კომპიუტერული პროგრამები.

„განრიგი მსმენელებთან შეთანხმებით გაიწერება. შესაძლებელი იქნება, რომ მსურველებმა კურსი გაიარონ, როგორც დღის პირველ ნახევარში, ასევე დღის მეორე ნახევარში. კურსის ბოლოს სერთიფიკატებს გავცემთ. მაღალი კვალიფიკაციის მქონე პედაგოგები მოწვეული იქნებიან თბილისიდან“, – ამბობს ნატო მამარდაშვილი.

არასამთავრობო ორგანიზაციის ,,თანადგომა შვილებს“ წარმომადგენლები განმარტავენ, რომ ,,ბიზნეს სისტემას“ ინკლუზიური კუთხით მნიშვნელოვანი საგანმანათლებლო პროექტები აქვს, რომლებიც შშმ პირებსა და მათ მშობლებს დაეხმარება.

„გვინდა, რომ ჩვენი შვილებისა და მათი მშობლების მხარდაჭერა შევძლოთ. კარგი იქნება თუ შევძლებთ, რომ სპეციალისტები სამედიცინო სფეროდანაც მოვიწვიოთ. ისინი უკეთ გვასწავლიან მათთან მიდგომის უნარ ჩვევებს“,– ამბობს არასამთავრობო ორგანიზაციის დამფუძნებელი ვეფხვია დიაკონაშვილი.

,,ბიზნეს სისტემის“ სასწავლო პროგრამებზე მიღება ახალციხეში 10 აგვისტოს დაიწყება და ერთი კვირის განმავლობაში გაგრძელდება. მსურველები, სპეციალური ფორმის შესავსებად, არასამთავრობო ორგანიზაცია ,,თანადგომა შვილებს“ უნდა დაუკავშირდნენ.

[თაკო ფეიქრიშვილი, ახალციხე]