შშმ პირების უფლებების დაცვისთვის ახალი პროექტი დაიწყო

შვეიცარიის საელჩოს მიერ დაფინანსებული პროექტი „ვიცხოვროთ, ვიმუშაოთ, ვიმოქმედოთ ერთად“ პირველი თებერვლიდან დაიწყო და მას სამცხე–ჯავახეთის ასოციაცია „ტოლერანტი“ ახორციელებს.

პროექტის მიზანია შეზღუდული შესაძლებლობის მქონე პირთა უფლებების დაცვა და ადვოკატირება, ახალციხეში მცხოვრები შშმ პირების სოციალური ინკლუზიის ხელშეწყობა და საზოგადოებრივი ცნობიერების ამაღლება.

„ეს პროექტი შეზღუდული შესაძლებლობის მქონე ადამიანების უფლებებისკენაა მიმართული. უფლებები ძალიან ბევრია, მაგრამ ამ ეტაპზე ჩვენ გვაქვს აღებული მხოლოდ ის, რომ ამ ქალაქში შეიქმნას თანაბარი შესაძლებლობების სივრცე. ამის ადვოკატირება გვაქვს ჩაფიქრებული“, – ამბობს ასოციაცია „ტოლერანტის“ ხელმძღვანელი და პროექტის დირექტორი ცირა მესხიშვილი.

მისივე თქმით, შეზღუდული შესაძლებლობის მქონე პირებისთვის ქალაქი ადაპტირებული არ არის და ამ მხრივ დიდი პროებლემებია. პროექტის ფარგლებში შეიქმნა ადვოკატირების ჯგუფი, რომელსაც ახალციხეში შშმ პირთა მიმართ საზოგადოების დამოკიდებულებების, საჭიროებებისა და არსებული რესურსების შესწავლა, გარემოს მონიტორინგი და ანგარიშისა და რეკომენდაციების მომზადება ევალება.

„ადვოკატირების ჯგუფში ჩაერთნენ პედაგოგები, რომლებიც ინკლუზიურ განათლებაზე მუშაობენ. ასევე, ქალაქის მერიის წარმომადგენლები მოვიწვიეთ, რადგან ეს რეკომენდაციები უნდა შემუშავდეს თვითმმართველობის და მმართველობის ორგანოების ორგანოების ჩართულობით. ასევე, ჩავრთეთ უნივერსიტეტის წარმომადგენლები და მოვიწვიეთ ყველა გამოცდილი ადამიანი, რომლებიც პროექტის განხორციელების პირველივე კვირიდან დაიწყებენ ადვოკატირებას“, – ამბობს ცირა მესხიშვილი.

[თამარ თოთაძე, ახალციხე]