დამოუკიდებლობის დღე სამცხე–ჯავახეთში [Photo]

ადიგენი

ეროვნული დღესასწაულისადმი მიძღვნილი ღონისძიება დაბა ადიგენში სპორტულ მოედანზე გაიმართა. ეროვნული ჰიმნის გაჟღერების შემდეგ, ადგილობრივმა ფოლკლორულმა ანსამბლებმა და ინდივიდუალურმა შემსრულებლებმა სხვადასხვა მუსიკალური და საცეკვაო ნომრები წარმოადგინეს. ღონისძიება კულტურის სამსახურის ორგანიზებით გაიმართა.

კულტურული ნაწილის შემდეგ, მოედანზე ადიგენის ადმინისტრაციულ ერთეულებს შორის ფეხბურთის მატჩი მოეწყო. ერთმანეთს დაბა აბასთუმანის და სოფელ ხევაშენის გუნდები დაუპირისპირდნენ.

ასპინძა

საქართველოს დამოუკიდებლობის დღეს, 26 მაისს, ტრადიციული ღონისძიება ასპინძის პარკში გაიმართა. ადგილობრივი თვითმმართველობის წარმომადგენლებმა საქართველოს ერთიანობისთვის ბრძოლაში დაღუპულ გმირთა მემორიალი ყვავილებით შეამკეს. რის შემდეგაც, ღონისძიების კულტურული ნაწილი დაიწყო. ადგილობრივ კონცერტში მონაწილეობა ასპინძაში არსებულმა ქორეოგრაფიულმა ანსამბლმა "სამცხემ" და ფოლკლორულმა ანსამბლმა "წუნდამ" მიიღეს.

ბორჯომი

დამოუკიდებლობის დღისადმი მიძღვნილი ღონისძიებები ბორჯომში დილის 11:00 საათზე, ცენტრალური სტადიონზე დაიწყო.

ადგილობრივებს დრესასწაული მაჟორიტარმა დეპუტატმა, გედევან ფოფხაძემ და მუნიციპალიტეტის გამგებელმა, დიმიტრი ყიფიანმა მულოცეს.
სპეციალურად ამ დღისთვის მომზადებული კონცერტი ღია ცის ქვეშ გაიმართა. მასში მონაწილეობა ადგილობრივმა ქორეოგრაფიულმა ანსამბლებმა, ვოკალურმა ჯგუფებმა და სოლო მომღერლებმა მიიღეს.

გაიმართა სპორტული შეჯიბრებებიც. ღონისძიებების პარალელურად კვების, ხალხური რეწვის და ხელნაკეთი ნივთების გამოფენა-გაყიდვა მიმდინარეობდა. სპეციალურად მოწყობილ ფანჩატურებში დამთვალიერებლებს კალიგრაფების ნამუშევრების ნახვის შესაძლებლობა ჰქონდა.

ახალქალაქი

დღეს, 26 მაისს, ახალქალაქში საქართველოს დამოუკიდებლობის 25 წლისთავი იზეიმეს. ღონისძიებები ქალაქის ბაღში მოეწყო. ადგილობრივებს დღესასწაული ადგილობრივმა ქორეოგრაფიულმა ანსამბლებმა მიულოცეს.

ნინოწმინდა

დღეს, 26 მაისს, ნინოწმინდის კულტურის ცენტრში, საქართველოს დამოუკიდებლობის დღისადმი მიძღვნილი კონცერტი გაიმართა.

ახალციხე

დამოუკიდებლობის დღე რეგიონში ყველაზე მასშტაბურად ახალციხეში აღინიშნა. ახალციხეში ღონისძიებები დილით, სამხედრო ტექნიკის გამოფენით დაიწყო. მოგვიანებით, ახალციხის სტადიონზე გარბენი და ფეხბურთი მოეწყო; პარალელურად, ტბის ტერიტორიაზე ბაიკერების წარმოდგენა მოეწყო; 13 საათიდან, ახალციხის ციხის ტერიტორიაზე მიმდინარეობდა: სპორტული შეჯიბრებები, გამოფენები და თოჯინების თეატრის წარმოდგენა.

საღამო ადგილობრივი ანსამბლების კონცერტით გაგრძელდა. დამოუკიდებლობის დღის აღნიშვნა კულტურის სამინისტროს ორგანიზებით გამართული გალა–კონცერტითა და ფოიერვერკით დასრულდა.



[თაკო ფეიქრიშვილი, ახალციხე]