‘ახალციხელობისადმი’ მიძღვნილი ღონისძიებები სრულდება

„ახალციხელობისადმი“ მიძღვნილი სპორტული ღონისძიებები და გამოფენები, რომელიც მთელი დღის განმავლობაში მიმდინარეობდა, დასრულდა. საღამოს ქვედა ციხის ამფითეატრში კონცერტები დაიწყო.

18:00 საათზე სცენა ადგილობრივმა ქორეოგრაფიულმა და ფოლკლორულმა ანსამბლებმა დაკავეს. ამ კონცერტის დასრულების შემდეგ კი დასკვნით კონცერტი დაიწყო, რომელშიც მონაწილეობენ: თემურ ყვითელაშვილი, სოფო ბედია, ბორის ბედია, ანსამბლი "შვიდკაცა“ და ასევე, ქორეოგრაფული ანსამბლი "სუხიშვილები“.

წვიმიანი ამინდის გამო, დღესასწაულის ღონისძიებათა განრგი მცირედ შეიცვალა. ჯერ ახალციხის საპატიო მოქალაქეები დაასახელეს და სპორტულ ღონისძიებებში გამარჯვებულები დააჯილდოვეს და კონცერტი ამის შემდეგ დაიწყო.

შეგახსენებთ, რომ „ახალციხელობის“ აღნიშვნა დღეს 14:00 საათიდან დაიწყო.ციხის ტერიტორიაზე ხალხური რეწვის ნიმუშები, ხელნაკეთი სამკაულები, ახალციხის სამხატვრო სკოლის ნამუშევრები, ფოტოსტუდია S & S–ის ფოტოები და მესხური სამზარეულოს კერძები გამოიფინა. პარალელურად, მიმდინარეობდა სხვადასხვა სპორტული შეჯიბრებები, მოეწყო ველორბოლა.

„ახალციხელობის“ დღისადმი მიძღვნილი ღონისძიებები, 22:00 საათზე, ფეიერვერკით დასრულდება.











[ლუბა გიორგაძე, ახალციხე]