ახალციხის სტადიონზე სპორტული ღონისძიებები მიმდინარეობს

შეჯიბრი მძლეოსნობაში 12:00 საათზე დაიწყო. მასში ახალციხის საჯარო და კერძო სკოლების მოსწავლეები მონაწილეობდნენ. თითოეული გუნდი ოთხი მორბენალით იყო დაკომპლექტებული: ორი გოგონა და ორი ვაჟი.

მძლეოსნობაში პირველი ადგილი მესამე საჯარო სკოლამ მოიპოვა; მეორე ადგილზე მეხუთე საჯარო სკოლა გავიდა; მესამე ადგილი კი პირველმა საჯარო სკოლამ დაიკავა.

"რა თქმა უნდა ცოტა სანერვიულო იყო, მაგრამ მაინც კარგად ვირბინეთ. მე–3 სკოლამ დავიკავეთ პირველი ადგილი, ძალიან გახარებულები ვართ. მინდა, რომ ყველა შეჯიბრში პირველ ადგილზე გავიდეთ“, – ამბობს მე–3 საჯარო სკოლის მოსწავლე ირინა აკოფიანი.

გამარჯვებული გუნდები ფასიანი საჩუქრებითა და შესაბამისი მედლებით 17:00 საათზე, ახალციხის ციხის ტერიტორიაზე დაჯილდოვდებიან.
მძლეოსნობის შემდეგ, ცენტრალურ სტადიონზე სკოლის გუნდებს შორის ფეხბურთის მატჩი გაიმართა.

შეგახსენებთ, რომ დამოუკიდებლობის დღისადმი მიძღვნილი ღონისძიებები ახალციხეში მთელი დღის განმავლობაში გაგრძელდება. ღონისძებები თამარაშვილის ქუჩაზე სამხედრო ტექნიკის გამოფენით გაიხსნა. გამოფენას ადგილობრივი ხელისუფლების წარმომადგენლებიც ესწრებოდნენ.

13:00 საათიდან ახალციხის ციხის ტერიტორიაზე, ხალხური რეწვის ნიმუშთა გამოფენა, სპორტული აქტივობები და კულტურული საღამო გაიმართება. საზეიმო ღონსიძიებები 21:30 საათზე, საქართველოს ჰიმნითა და ფოიერვერკით დასრულდება.



[თაკო ფეიქრიშვილი, ახალციხე]