26 მაისს მესხეთში გამართული ღონისძიებები

ადიგენში დამოუკიდებლობის დღისადმი მძღვნილი ღონისძიებები დაბაში მდებარე სპორტულ მოედანზე მოეწყო. ადიგენის მუნიციპალიტეტის კულტურის სამსახურის მიერ ორგანიზებული კონცერტი ეროვნული ჰიმნით დაიწყო ადგილობრივი ანსამბლების მიერ შესრულებული სხვადასხვა მუსიკალური და საცეკვაო ნომრებით გაგრძელდა.

მოსახლეობას დამოუკიდებლობის დღე ადიგენის მუნიციპალიტეტის გამგებელმა ზაქარია ენდელაძემ და ადგილობრივი ხელისუფლების სხვა წარმომადგენლებმა მიულოცეს.

დაბაში 26 მაისის აღნიშვნა სპორტული ღონისძიებით დაასრულეს. ადიგენის მუნიციპალიტეტის გამგეობასა და საკრებულოს გუნდებს შორის, ფეხბურთში ამხანაგური შეხვედრა გაიმართა.





ასპინძაში, 26 მაისის აღსანიშნავად გართობისა და დასვენების პარკში შეიკრიბნენ. აქ მამა ზაქარიამ საქართველოს ერთიანობისთვის ბრძოლაში დაღუპული გმირების სულების მოსახსენებელი პარაკლისი გადაიხადა. შემდეგ კი ადგილობრივი თვითმართველობის წარმომადგენლებმა საქართველოს ერთიანობისთვის ბრძოლაში დაღუპულ გმირთა მემორიალი ყვავილებით შეამკეს.

დაბაში ასევე სპორტული თამაშები გაიმართა. გამარჯვებულებს სიგელები ასპინძის მუნიციპალიტეტის გამგებელმა ლევან ცაბაძემ გადასცა.
ამის შემდეგ კი ასპინძაში დასკვნითი კონცერტი მოეწყო. მასში მოანწილეობას ადგილობრივი შემოქმედებითი ჯგუფები იღებდნენ.





დამოუკიდებლობის დღე ბორჯომშიც კულტურული და სპორტული ღონისძიებებით აღინიშნა. აქტივობები ცენტრალური პარკის მიმდებარე ტერიტორიიდან დაიწყო, სადაც ბორჯომის მუნიციპალიტეტის წარმომადგენლები, ცეკვისა და სიმღერის ანსამბლები, სასპორტო სკოლის სპორტსმენები და ადგილობრივი მოსახლეობა შეიკრიბა. ცეკვისა და სიმღერის ანსამბლებმა აქ სხვადასხვა ნომრები წარმოადგინეს, შემდეგ კი ადგილობრივი მუნიციპალიტეტის წარმომადგენლემა დამოუკიდებლობისათვის ბრძოლაში დაღუპული გმირების სულების პატივსაცემად 9 აპრილის მემორიალი გვირგვინითა და ყვავილებით შეამკეს.

ამის შემდეგ საზეიმო მსვლელობა კოსტავას მოედანზე კულტურულ-სპორტული ღონისძიბებით გაგრძელდა. ანსამბლების "მერმისის", "იმედის", "ფერხისისა" და "გაზაფხულის" მოცეკვავეებმა საქართველოს სხვადასხვა კუთხის ცეკვები წარმოადგინეს. თანამედროვე და სპორტული ცეკვების ჯგუფმა "სილუეტმა" კი სამხედრო თემატიკაზე დადგმული სანახაობრივი წარმოდგენა უჩვენა მაყურებელს.

ღია ცის ქვეშ მოწყობილ ღონისძიებას ბორჯომში მყოფი ტურისტებიც შეუერთდნენ.





დამოუკიდებლობის დღისადმი მიძღვნილი ღონისძიებები გაიმართა ახალციხის მუნიციპალიტეტის სოფლების აწყურისა და ვალის კულტურის სახლებში, ასევე, ურავლის, მუსხის, წყალთბილის, ზემო სხვილისის, ივლიტის, წყორძისა და ზიკილიის ახლგაზრდულ ცენტრებში. ახალგარზდებმა აუდიტორიას, ლექსები, ფოლკლორული და ქორეოგრაფიული ნომრები შესთავაზეს.



შეგახსენებთ, რომ 91 წლის წინ, 1918 წლის 26 მაისს, თბილისში საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო. საქართველოს დემოკრატიულმა რესპუბლიკამ, რომლის დამოუკიდებლობა ევროპის წამყვანმა ქვეყნებმა ცნეს, არსებობა სამი წლის თავზე, საბჭოთა რუსეთის მიერ განხორციელებული ოკუპაციის შემდეგ, შეწყვიტა.

საქართველომ დამოუკიდებლობის აღდგენა 70 წლის შემდეგ შეძლო. 1991 წლის 9 აპრილს, საქართველოს ხელისუფლებაში მოსულმა ეროვნულმა ძალებმა, 31 მარტის საყოველთაო რეფერენდუმის საფუძველზე, საქართველოს სახელმწიფოებრივი დამოუკიდებლობა აღადგინეს.

[sknews.ge]