ახალციხეში 26 მაისისადმი მიძღვნილი ღონისძიებები დასრულდა

საქართველოს დამოუკიდებლობის საიუბილეო თარიღთან დაკავშირებით ღონისძიებები დღეს, 26 მაისს დილის 11:00 საათიდან, სპორტული აქტივობებით დაიწყო და „ახალციხის ციხის“ ტერიტორიაზე სხვადასხვა კულტურული ღონისძიებით გაგრძელდა.

მთელი დღის განმავლობაში მიმდინარეობდა თეატრალური წარმოდგენები, ნახატების, ხალხური რეწვისა და ხელოვნების ნიმუშების გამოფენები. საგარეო საქმეთა სამინისტროს ორგანიზებით ციხის ტერიტორიაზე ძველი ქართული საკვირაო ბაზრობის ტრადიცია გაცოცხლდა. თოჯინების თეატრმა კი პატარებისათვის წარმოდგენა გამართა.

დღესვე, ავტოსადგურის ტერიტორიაზე გამოფენილი იყო სამხედრო ტექნიკა.

26 მაისისადმი მიძღვნილი ღონისძიებების დასკვნითი ნაწილი, თბილისიდან მოწვეულ მომღერლებს დაეთმო. ჯგუფებმა „ფორტემ“ და „რეგიონმა“, ასევე გიორგი სუხიტაშვილმა და აჩიკო ნიჟარაძემ ყველასათვის ნაცნობი სიმღერები შეასრულეს.

საზეიმო ღონისძიებები 22:00 საათზე ფეიერვერკით დასრულდა.











[ლუბა გიორგაძე, ახალციხე]