ახალციხის საკრებულომ ააიპ-ების ანგარიში მოისმინა

დეპუტატებმა მერიის საფინანსო-საბიუჯეტო სამსახურისა და ააიპ–ების: „ახალციხის მძლეოსნობის სპორტული კლუბის“, „ კომპლექსური სასპორტო სკოლის“, „სათნოებისა სახლისა“ და „ახალციხის საზოგადოებრივი ჯანმრთელობის დაცვის ცენტრის“ 2015 წელსა და 2016 წლის პირველ კვარტალში გაწეული სამუშაოების ზოგადი ანგარიში მოისმინა.

საფნანსო–საბიუჯეტო სამსახურმა დეპუტატებს გააცნო, რა პირობებში მუშაობს სამსახურის 7 თანამშრომელი; ჯანდაცვის სამსახურმა საბავშვო ბაღებში არსებულ მდგომარეობაზე ისაუბრა; სათნოების სახლის ხელმძღვანელმა ბენეფიციართა კვების რაციონის შესახებ ისაუბრა; სასპორტო სკოლისა და მძლეოსნობის სპორტული სკოლის ხელმძღვანელებმა საქართველოში, სომხეთსა და ბაქოში მიღწეულ წარმატებებზე ისაუბრეს და დაგეგმილი ღონისძიებები დაანონსეს.

მძლეოსნობის სასპორტო სკოლის ხელმძღვანელის ზიგმუნდ ზილბერშტეინის განმარტებით, მიმდინარე წლის აგვისტოს თვეში, მასშტაბური ღონისძიება „გეზრბენი“ გაიმართება, რომელში მონაწილეობა ყველა მსურველს შეეძლება.

საკრებულოს სხდომაზე დეპუტატებმა კენჭი, ახალციხეში საავადმყოფოს ტერიტორიაზე, ყოფილი სამხედრო ნაწილის აუქციონის წესით გასხვისებასაც უყარეს. ქალაქის საკრებულოს თავმჯდომარის დავით ლომიძის განმარტებით, ეს ბიუჯეტში თანხების შეტანას ემსახურება.

დღევანდელ სხდომაზე დეპუტატებმა სულ 6 საკითხი განიხილეს.

[ლუბა გიორგაძე, ახალციხე]