ახალციხის სასპორტო სკოლაში სპორტული კლუბები შეიქმნება

სასპორტო სკოლაში კლუბების შექმნის შესახებ ახალციხის საკრებულომ დღეს, 28 მარტს გამართულ რიგგარეშე სხდომაზე იმსჯელა.

როგორც სხდომაზე გახდა ცნობილი, პირველ რიგში ჭადრაკის კლუბი ჩამოყალიბდება, რომელიც ექვს აპრილს, საქართველოს ჭადრაკის ფედერაციის მიერ გამართულ ტურნირში მიიღებს მონაწილეობას. შეჯიბრში, ქვეყნის მასშტაბით, 20 გუნდი იქნება წარმოდგენილი.

"ამ ტურნირში რომ მიგვეღო მინაწილეობა ჯერ კლუბი უნდა ჩამოგვეყალიბებინა. ამ კლუბების კარგი მხარე ის არის, რომ ჯილდოებთან ერთად, ჭადრაკის ფედერაციისგან დაფინანსებასაც მივიღებთ", – განმარტა სხდომაზე სამცხე–ჯავახეთის ჭადრაკის ფედერაციის პრეზიდენტმა დავით სამსონიძემ.

როგორც საკრებულოს თავმჯდომარემ გელა ნოზაძემ განაცხადა, რიგგარეშე სხდომის ჩატარება, ტურნირის მოახლოების გამო გახდა საჭირო.

ეს, იყო ერთ–ერთი საკითხი, რის გამოც, 26 მარტის საკრებულოს სხდომაზე ახალციხის მერი და კულტურის, განათლების, სპორტის და ახალგაზრდულ საქმეთა კომისიის თავმჯდომარე ამბარცუმ ბაბოიანი ერთმანეთს სიტყვიერად დაუპირისპირდნენ.



[ლუბა გიორგაძე, ახალციხე]