ქალაქ ახალციხის ბიუჯეტის პირველი კვარტალი 94% პროცენტით შესრულდა

ქალაქ ახალციხის საკრებულოს ინფორმაციით მიმდინარე წლის პირველ კვარტალში, ადგილობრივი ბიუჯეტი 94%–ით შესრულდა.

თვითმმართველობის ხელმძღვანელი პირები შედეგით კმაყოფილები არიან, თუმცა ოპოზიცია წარმომადგენლობით ორგანოს მუშაობას უწუნებს.

„პროექტების შესრულებისას, იყო ერთი არასაიმედო კომპანია, რომელსაც უარი ეთქვა და გაასაჩივრა, რის გამოც პროექტის განხორცილება გადაიდო, მსგავსი ხარვეზები ხშირად არის, რაც გამოსწორებადია. საერთო ჯამში შედეგით უკმაყოფილო არ ვართ“–ამბობს, ქალაქის საკრებულოს თავმჯდომარე დავით ლომიძე.

„ნაციონალური მოძრაობის“ წარმომადგენელი მალხაზ გიქოშვილის განცხადებით, შესრულებული 94% მცირეა. საკრებულოს უმცირესობის დეპუტატი და მერიას მეტი დაკვირვებისკენ მოუწოდებს:“ტენდერების გამოცხადებისას, ქალაქის მერიამ უნდა იცოდეს, რომ შესაძლოა არაკეთილსინდისიერი შემსრულებელი შეხვედეს და საქმე არ გააკეთოს“.

დღევანდელ საკრებულოს სხდომაზე საკრებულოს დეპუტატები, ჯანდაცვისა და სოციალური სამსახურის 2016 წლის პირველი კვარტალის მუშაობის შედეგებსაც გაეცვნენ.

ქალქის საკრებულოს თავმჯდომარის, დავით ლომიძის განცხადებით ჯანდაცვის კუთხით ბენეფიციართა რაოდენობა, ვისაც დაფინანსება ესაჭიროება მკვეთრად გაიზარდა.

მისი განმარტებით, პირველ კვარტალში დაგეგმილთან შედარებით 23.000 ლარით მეტი დაიხარჯა– „ავადმყოფობამ ძალიან იმატა ახალციხეში და იძულებულნი ვართ თანხებიც გავზარდოთ“.

25 აპრილს, ქალაქის საკრებულოს სხდომაზე დეპუტატებმა ჯამში ექვს საკითხს უყარეს კენჭი.

[ლუბა გიორგაძე, ახალციხე]