ახალციხის სასპორტო სკოლაში შენობის კეთილმოწყობას ითხოვენ

დღეს, 26 აპრილს ახალციხის კომპლექსური სასპორტო სკოლის დირექტორმა გრიგოლ ტაბატაძემ საკრებულოს დეპუტატებს გასული, 2016 წლის ანგარიში ჩააბარა. გრიგოლ ტაბატაძემ სპორტსმენების წარმატებებსა და სასპორტო სკოლის პრობლემებზე ისაუბრა.

"გასახდელები არ გვაქვს, მოსწავლეები სადაც თამაშრობენ, იქვე იცვლიან. იქ, სადაც გასახდელები გვქონდა, ახლა ტრენაჟორების დარბაზია. სიცივისა და არასაკმარისი გათბობის გამო, ზამთარში ძალიან გვიჭირს, ამიტომ ბავშვთა რაოდენობა ზამთრის პერიოდში იკლებს", – განაცხადა საკრებულოს სხდომაზე გრიგოლ ტაბატაძემ.

მისივე თქმით, პრობლემაა საშხაპეების არარსებობაც.

ახალციხის კომპლექსურ სასპორტო სკოლაში 14 ჯგუფი სპორტის 9 სახეობას ეუფლება, ჯამში კი დაწესებულებაში 250–მდე მოსწავლე დადის.

საკრებულოს საფინანსო–საბიუჯეტო, ეკონომიკისა და ქონების მართვის საკითხთა კომისიის თავმჯდომარის შოთა ნასყიდაშვილის განმარტებით, სასპორტო სკოლას ნამდვილად აქვს მსგავსი სახის პრობლემები და საჭიროა მათი მხარდაჭერისთვის მომავალი წლის ბიუჯეტში თანხა გამოიყოს.

[თინათინ ზაზაძე, ახალციხე]