ახალციხეში სტიქიისგან მიყენებულ ზარალს ითვლიან

ახალციხის მერიაში განმარტავენ, რომ სახურავგადახდილ კორპუსთან დაკავშირებით მიყენებული ზარალის დასათვლელად სპეციალური კომისია გუშინვე შეიქმნა.

„მთელი ღამის განმავლობაში მუშაობდნენ და დღეს დილიდანაც გააგრძელეს. ჯერ ზარალის ოდენობა ზუსტად არ ვიცით, სამუშაო პროცესი ამ დრომდე მიმდინარეობს“, – ამბობს მერიის საზოგადოებასთან ურთიერთობის სამსახურის წარმომადგენელი სოფო მესხი.

მისივე თქმით, შეიქმნა საგანგებო შტაბიც, რომელსაც ქალაქის მერი გიორგი კოპაძე ხელმძღვანელობს: „აქ შედიან ზედამხედველობის, ინფრასტრუქტურისა და კეთლიმოწყობის სამსახურის თანამშრომლები, მერის მოადგილე და რწმუნებულები“.

მერის მოადგილის ზაზა გელაძის განმარტებით, სახურავის გადასახურად თანხა ადგილობრივი ბიუჯეტიდან გამოიყოფა: „ხარჯთაღრიცხვას გავაკეთებთ და მაშინვე დავიწყებთ გადახურვას. იმისათვის , რომ დროში არ გაიწელოს, მშენებელ კომპანიას პირდაპირი შესყიდვის წესით შევარჩევთ“, – ამბობს ზაზა გელაძე.

შეგახსენებთ, რომ გუშინ, 23 მაისს, საღამოს, ძლიერმა ქარმა თამარაშვილის ქუჩაზე მდებარე რვასართულიან კორპუსს სახურავის ნაწილი გადახადა. გადახდილი სახურავი ბინის ეზოში დაეცა, რა დროსაც 5 ავტომობილი დაზიანდა. შემთხვევას მსხვერპლი არ მოჰყოლია.

ჩამოვარდნილმა სახურავმა ასევე დააზიანა ელექტროგადამცემი ხაზებიც. ამ დრომდე თამარაშვილის ქუჩაზე რამდენიმე კორპუსი ელექტროენერგიის გარეშეა დარჩენილი.
[თინათინ ზაზაძე, ახალციხე]