ახალციხეში, სახურავგადახდილ კორპუსში წყალი ჩასდით [PHOTO]

ძლიერი წვიმის შედეგად, რვასართულიან კორპუსში მცხოვრებლებთან წვიმა შუადღიდან, დაახლოებით 16:00 საათიდან ჩადის. სახურავიდან ჩასულმა წყალმა ბოლო სამი სართულის: მერვე, მეშვიდე და მეექვსე სართულის მცხოვრებლები დააზარალა.

„წვეთი წყალი არ ჩამოსულა აქამდე. ჩვენ სახურავს გადავაფარეთ ისეთი საფენი, რომ არ უნდა ჩამოგვსლოდა წყალი, თუმცა დღეს დაიწყეს სახურავის შეკეთება და ჩამოგვივიდა“,–ამბობს ნონა თამარაშვილი.

რვასართულიანის მცხოვრებლები ადგილობრივი თვითმმართველობისგან დახმარებას ითხოვენ.

ახალციხის მერიაში აცხადებენ, რომ სახურავგადახდილი კორპუსის შესაკეთებლად სამუშაოები დაწყებულია: "ყველაფერი მზად გვაქვს, მასალაც სახურავზე გვაქვს ატანილი. ამ ამინდის რა ვუყოთ?! დაუკავშირდები ახლა, ჩავლენ და ნახავენ“, – აცხადებს ქალაქის მერის მოადგილე ზაზა გელაძე.

შეგახსენებთ, 23 მაისს, საღამოს, ქარმა ახალციხეში მრავალსართულიან საცხოვრებელ კორპუსს სახურავი გადახადა. იმავე დღეს შეიქმნა ზარალის დამთვლელი კომისია და საგანგებო შტაბი, ახალციხის მერის, გიორგი კოპაძის ხელმძღვანელობით.

შპს „მშენებელი 2004“–მა, რომელიც დროის დაზოგვის მიზნით, მერიამ ერთ პირთან მოლაპარაკების წესით შეარჩია, გუშინ 28 მაისს, კორპუსის გადახურვა დაიწყო. თუმცა, ჯერ სამუშაოები დასრულებული არ არის.











[ვარლამ წიკლაური, ახალციხე]