ახალციხეში, სტიქისგან სახურავგადახდილ კორპუსში წყალი ჩადის

ინგა ანძაველიძე კოსტავას ქუჩაზე, 163–ე კორპუსის მეხუთე სართულზე ცხოვრობს. ამბობს, რომ სახურავიდან ჩასულმა წვიმამ სასტუმროსა და სამზარეულოს ოთახები გააფუჭა.

„პირველმა დღემ ისე არ დააზიანა, რაც შემდეგმა წვიმებმა. ჩემგან ჩასულმა წყალმა მეზობელიც ჩარეცხა. ტაშტებით და ქვაბებით დავრბივართ წვიმის დროს“, – ამბობს ინგა ანძაველიძე.

მისი თქმით, ამ დრომდე მათთან დასახმარებლად არავინ მისულა.

„სტიქიიდან მესამე დღეს, 5 აგვისტოს, ახალციხის მერიაში განგვიმარტეს, რომ „ბრეზენტებს“ ვეძებთო, მაგრამ არავის არაფერი მოუტანია. ჩემს მეორე მეზობელთანაც ჩამოვიდოდა, მაგრამ ის საზღვარგარეთ არის და არც იცის რა მოხდა“, – ამბობს ანძაველიძე.

ახალციხის მერიაში განმარტავდნენ, რომ ვიდრე 3 აგვისტოს შედეგებს დაითვლიდნენ კოსტავას ქუჩაზე სახურავის გადახურვას მანამდე დაიწყებდნენ.

„რაც შეიძლება სწრაფად უნდა გადაიხუროს, რომ ხალხი ცუდ დღეში არ აღმოჩნდეს. სარეზერვო ფონდში 40 ათასი ლარი გვაქვს და ვფიქრობ 20 ათასი ეყოფა გადახურვას. პროექტი დგება და ეს ყველაფერი დაითვლება“, – განაცხადა 8 აგვისტოს უკვე ყოფილმა ახალციხის მერმა გიორგი კოპაძემ.

დღეს, 11 აგვისტოს მერიის საზოგადოებასთან ურთიერთობის სამსახურის წარმომადგენელმა სოფო მესხმა განგვიმარტა, რომ ამ ეტაპზე ბინის გადასახურად სახარჯთაღრიცხვო–საპროექტო სამუშაოები მიმდინარეობს, რაც შეეხება „ბრეზენტით“ გადახურვას, მსგავსი დაპირება თვითმმართველობიდან არავის მიუცია.

შეგახსენებთ, რომ 3 აგვისტოს, ქალაქ ახალციხეში ძლიერი სეტყვა დაახლოებით 15 წუთის განმავლობაში გრძელდებოდა. დაზიანდა კოსტავას, თამარაშვილის, ხანძთელისა და მიქუტიშვილის ქუჩები. მესხეთის ქუჩაზე საცხოვრებელი სახლის ეზოს კედელი ჩამოეშალა. კოსტავას ქუჩაზე კი წვიმა ოთახებში ჩავიდა. ე.წ „ხუთსართულიანებში“ კი კორპუსს სახურავი ნაწილობრივ გადახადა.

[თინათინ ზაზაძე, ახალციხე]