ორგანიზაციამ ”ერთსულოვნება საზოგადოების უფლებებისათვის” ახალციხეში ოფისი გახსნა

რეგიონში ეს ორგანიზაციის პირველი ოფისია. ”ერთსულოვნება საზოგადოების უფლებებისათვის” საქართველოს პრეზიდენტის მიხეილ სააკაშვილის გადადგომის მოთხოვნით ხელმოწერებს აგროვებს.

- ”ჩვენი მიზანია ქვეყანაში ორხელისუფლებიანობამ ქაოსი არ გამოიწვიოს და ერთხელ და სამუდამოდ დასრულდეს სააკაშვილის რეჟიმი”, - განმარტავს არასამთავრობო ორგანიზაცია ”ერთსულოვნება საზოგადოების უფლებებისათვის” ახალციხის ორგანიზაციის თავმჯდომარე გუჯა ბიჭაშვილი.

რეგიონული ოფისის გახსნას ორგანიზაციის სათაო ოფისისა და კოალიცია ”ქართული ოცნების” ადგილობრივი წარმომადგენლები ესწრებოდნენ.

- ”საქართველოს ყოფილი პრეზიდენტი, მე მაინც ყოფილს ვუწოდებ, დამნაშავეა თითოეული მოქალაქის ცხოვრებაში. როცა პირველად პრეზიდენტი გახდა, ერთ-ერთ გამოსვლაზე არ დაუმალავს და ქართულ ინტელიგენციას ჩარეცხილები უწოდა. ამაზე მეტი შეურაცხყოფა შეიძლება რამე იყოს?! როგორ შეიძლება საზოგადოების რომელიმე ფენას ჩარეცხილები უწოდო?! ეს არის გარკვეული პოლიტიკა, რომ საქართველო მუჭში აეღოთ და შემდეგ ებატონათ”, - განაცხადა რეჟისორმა რეზე ჩხეიძემ, რომელიც აღნიშნული ორგანიზაციის წევრია.


ამ ოფისში წინასაარჩევნოდ ”ნაციონალების” შტაბი ფუნქციონირებდა.

[თამარ თოთაძე, ახალციხე]