ადიგენში მუსლიმების სასაფლაოსთვის ტერიტორიის რეგისტრაცია დაიწყო

სოფელ ადიგენში იმ ტერიტორიას, რომელიც სასაფლაოსთვის ნასყიდობის ხელშეკრულების საფუძველზე, გამგეობას უნდა გადაეცეს, ყადაღა დღეს, 16 მაისს მოეხსნა.

„ხე–ტყის გამო დაჯარიმებული ვიყავი და ჩემ ქონებას ყადაღა ედო. არაფრის განკარგვის უფლება არ მქონდა. დარჩენილი 2 500 ლარი უკვე დავფარე“, – ამბობს აღნიშნული ტერიტორიის კერძო მესაკუთრე, ადიგენის მკვიდრი ზაზა გახოკიძე.

მას სათიბ–სახნავი ფართობი, რომლის ნაწილსაც სასაფლაოსთვის თმობს, ამ დრომდე საჯარო რეესტრში რეგისტრირებულიც არ ჰქონდა.
„ნახაზები რომ გავაკეთეთ და ნაკვეთები დარეგისტრირდა, აღმოჩნდა, რომ ქონებას ყადაღა ედო. ამიტომ ცოტახნით ამ საკითხის მოგვარება შეფერხდა. პარასკევს გახოკიძემ დარჩენილი თანხა დაფარა და დღეს დილიდან ფართობი უკვე თავისუფალია“, – ამბობს ადიგენის მუნიციპალიტეტის გამგეობის ეკონომიკის სამსახურში ქონების მართვის სპეციალისტი გურამ ბოჩიკაშვილი.

მისი თქმით, დღეს დილითვე გაკეთდა საკადასტრო აზომვითი ნახაზები და აქ არსებული სახნავ–სათიბი ფართობი ორ ნაწილად გაიყო: „მთლიან ტერიტორიას ჩვენ არ გვაძლევს. ჯამში გამგეობას გახოკიძისგან 2 200 კვადრატული მეტრი გადაეცემა. ამიტომ ეს ფართობი ორად გავყეთ“.
ტერიტორია, რომელიც ორად იყოფა ჯამში დაახლოებით 3 000 კვადრატული მეტრია. აქედან 1 500 კვადრატული მეტრი სათიბია, დანარჩენი სახნავი. როგორც გამგეობაში აცხადებენ, სათიბი ტერიტორია თვითმმართველობას მთლიანად გადაეცემა, დარჩენილი ფართობი კი გახოკიძეს სახნავი ნაკვეთიდან ჩამოეჭრება.

„მესაკუთრეს სახნავად დაახლოებით 800 კვადრატული მეტრი დარჩება“, – ამბობს ბოჩიკაშვილი.

მისი განმარტებით, ორად გაყოფილი ნაკვეთის საკადასტრო აზომვითი ნახაზები საჯარო რეესტრში დღეს დილით შეიტანეს: „ოთხ დღეში პასუხი უკვე იქნება და დანარჩენ პროცედურებს შემდეგ გავაგრძელებთ“.

რა დაუჯდება ადიგენის გამგეობას გახოკიძისგან 2 200 კვადრატული მეტრის შესყიდვა ჯერ უცნობია.

შეგახსენებთ, რომ სოფელ ადიგენში მუსლიმებისთვის სასაფლაოს ტერიტორიის ცალკე გამოყოფა დაპირისპირების თემა გახდა. ორდღიანი კონფლიქტის შემდეგ მხარეებმა შეთანხმებას მიაღწიეს, საერთო სასაფლაო გაკეთდება და შუაში ზღვარი გაივლება. ამ ტერიტორიაზე გარდაცვლილი მუსლიმი უკვე დაკრძალეს.


ზაზა გახოკიძე, ვისგანაც თვითმმართველობა ტერიტორიას ყიდულობს

[თამუნა უჩიძე, ადიგენი]