პირველი მიცვალებული დაპირისპირების შემდეგ– ადიგენში მუსლიმს კრძალავენ

მუსლიმები და ქრისტიანები გარდაცვლილისთვის საფლავს ჭრიან. სოფელი ადიგენი, 7 მარტი, 2016წ.

18 წლის გოგონა, რომელსაც ცერებრალური დამბლა ჰქონდა და ბოლო ერთი კვირა საავადმყოფოში იწვა, კონფლიქტის დასრულების მეორე დღეს გარდაიცვალა. გოგონას ჩამოსვენებას მთელი სოფელი დახვდა.

„არავინ დარჩენილა ჩვენი ჭირი რომ არ გაეზიარებინა. მთელი სოფელი გარეთ დაგვხვდა“, – ამბობს ოჯახის ახლობელი მუსლიმი გივი აბაშიძე.
გოგონას დღეს კრძალავენ. გარდაცვლილის ოჯახში დილიდან მიდიან როგორც ადგილობრივი მუსლიმები, ასევე ქრისტიანები, არამხოლოდ ადიგენიდან, არამედ მეზობელი სოფლებიდანაც. სოფელში ირწმუნებიან, რომ მათ ურთიერთობებში არაფერი შცვლილა.


გარდაცვლილის ოჯახში თანასოფლელები არიან შეკრებილი. სოფელი ადიგენი, 7 მარტი, 2016წ.

„ყველასთან კარგი ურთიერთობა გვაქვს ისევ. არც ვყოფილვართ ცუდად განწყობილები ერთმანეთის მიმართ“, – ამბობს მუსლიმი ავთანდილ კოჩალიძე.

რიტუალების სახლში, სადაც ქელეხი მზადდება, დილიდან ქრისტიანი და მუსლიმი მეზობლები მუშაობენ. მზარეულები მუსლიმი ოთარ ხოზრევანიძე და ქრისტიანი გიორგი გვამზირიძე ფლავს, ლობიოს, ხაშლამასა და აჭარულ ჰასულთას აკეთებენ, ქალები კი სუფრას აწყობენ.


ადგილობრივი მუსლიმები და ქრისტიანები ქელეხისთვის სადილს ამზადებენ. სოფელი ადიგენი, 7 მარტი, 2016წ.

„რაც მოხდა, პოლიტიკის ბრალი იყო, არასდროს გვიჩხუბია და არც ახლა გვაქვს გასაყოფი რამე. ერთად ვჭამთ და ერთად ვსვამთ“, – ამბობს გიორგი გვამზირიძე.

„40 წელია ძმები ვართ მე და გიორგი, ახლა რაზე უნდა ვიჩხუბოთ?! სულ ერთად ვაკეთებდით ასეთ დროს საჭმელებს და ახლაც ასეა, არაფერი შეცვლილა. რაც ადიგენშია, ამაზე უკეთეს მეზობლობას, დამიჯერეთ, ვერსად ნახავთ“, – გვეუბნება ოთარ ხოზრევანიძე.


ადგილობრივი მუსლიმები და ქრისტიანები ქელეხისთვის სადილს ამზადებენ. სოფელი ადიგენი, 7 მარტი, 2016წ.

რიტუალების სახლში, მაგიდებზე დილიდან ჭურჭელს აწყობს ქრისტიანი ნინო ჩაგუნავა: „არაფერი შცვლილა, როგორც იყო აქამდე, ისევ ისე ვართ ერთმანეთში. როგორც აქამდე ვეხმარებოდით ერთმანეთს, ისევ ისე ვეხმარებით“.

„მტრები რომ ვიყოთ ერთმანეთის, ახლა აქ ვიქნებოდი?! რა გვაქვს გასაყოფი?! მთელი სოფელი ერთად ვიქნებით ჭირშიც და ლხინშიც“, – აცხადებს ქრისტიანი მზევინარ კუჭავა, რომელიც მეზობელ მუსლიმებს სადილების მომზადებაში დილიდანვე შეუერთდა.

ახალ გამოყოფილ ტერიტორიაზე პირველი საფლავი მუსლიმი გარდაცვლილისთვის, ერთად გაჭრეს მეზობელმა მუსლიმებმა და ქრისტიანებმა. აქ დილიდანვე შეკრებილი არიან მუსლიმი სასულიერო ლიდერები.


ადგილობრივი მუსლიმები და ქრისტიანები რიტუალების სახლში სუფრას აწყობენ. სოფელი ადიგენი, 7 მარტი, 2016წ.

„ამ ეტაპისთვის მთავარია, რომ სიმშვიდეა“ , – ამბობს ჭელის მეჩეთის წინამძღვარი ჯამბულ აბულაძე.

„ის ვისიცაა ჯერ–ჯერობით ეს მიწა, დილითვე იყო მოსული და თქვა, რომ არანაირ პრობლემას არ შექმნის“, – აცხადებს სამცხე–ჯავახეთის მუფთი მამუკა ვაშაყმაძე.


თანასოფლელები სამძიმარზე მიდიან. სოფელი ადიგენი, 7 მარტი, 2016წ.

ქრისტიანი ზაზა გახოკიძის ბაღში 18 წლის მუსლიმ გოგონას დღეს დაასაფლავებენ.

„უკვე ვთქვი, რომ ამ მხრივ პრობლემას არასდროს შევქმნი. სხვამ რომ ვითარება დაძაბოს, ამასც არ დავუშვებ“, – ამბობს მიწის მესაკუთრე ზაზა გახოკიძე.

პირველ მიცვალებულს სოფელში ისე კრძალავენ, რომ ჯერ სასაფლაოს ტერიტორიის გამოყოფის საკითხის ოფიციალური მხარე მოგვარებული არ არის.

შეგახსენებთ, რომ სოფელ ადიგენში მუსლიმებისთვის სასაფლაოს ტერიტორიის ცალკე გამოყოფა დაპირისპირების თემა გახდა. ორდღიანი კონფლიქტის შემდეგ მხარეებმა შეთანხმებას მიაღწიეს, საერთო სასაფლაო გაკეთდება და შუაში ზღვარი გაივლება.

[თამუნა უჩიძე, ადიგენი]