ადიგენში მუსლიმების სასაფლაოსთვის ადგილი უნდა გამოიყოს

ადიგენის მუნიციპალიტეტის სოფელ ადიგენში მუსლიმების სასაფლაოსთვის ტერიტორია გამოიყოფა. გადაწყვეტილება რელიგიის საკითხთა სახელმწიფო სააგენტოში ფინანსური და ქონებრივი საკითხების შემსწავლელმა კომისიამ 25 თებერვალს გამოიტანა.

„ეს საკითხი განსახილველად ქვემდებარეობის მიხედვით ადიგენის გამგეობამ ჩვენთან გამოგზავნა. გამგეობას კი მუსლიმთა სამმართველომ მიმართა. საკითხი დადებითად გადაწყდა“, – ამბობს რელიგიის სახელმწიფო სააგენტოს ხელმძღვანელი ზაზა ვაშაყმაძე.

მიუხედავად იმისა, რომ მუსლიმების სასაფლაოსთვის ტერიტორიის გამოყოფის საკითხი უკვე გადაწყვეტილია, სოფელ ადიგენში ქრისტიანი თემის წარმომადგენლები აცხადებენ, რომ სოფელში მუსლიმებს სასაფლაოს გახსნის უფლებას არასდროს მისცემენ.

„ეს იქნება ისე დაუსრულებელი ამბავი, როგორც ახლა მოხეშია. სოფელში მაგის უფლებას მუსლიმებს არავინ მისცემს. არის ადიგენში ქრისტიანების სასაფლაო და თუ უნდათ გარდაცვლილი მუსლიმიც იქ დაასაფლაონ“, – ამბობს სოფელ ადიგენშიო მცხოვრები ქრისტიანი ზურაბ ტაბიძე.

მისივე თქმით, სოფელში ახალი სასაფლაოს გახსნას ყველა ქრისტიანი შეეწინააღმდეგება: „ადიგენის გამგებელმა და გამგეობამ თავიდან მოიშორა ეგ საკითხი და განსახილველად სააგენტოს გადასცა. მაგათ ქრისტიანები და ადგილობრივი მაცხოვრებლები სჭირდებათ არჩევნებისთვის ხმები რომ წაიღონ“.

სამცხე–ჯავახეთის მუფთი მამუკა ვაშაყმაძე ამბობს, რომ მათ კონსტიტუციის ფარგლებში იმოქმედეს: „ყველაფერი კანონის სრული დაცვით განხორციელდა“.

რელიგიის სააგენტოს მიერ მიღებული გადაწყვეტილება შესასრულებლად ადიგენის მუნიციპალიტეტის გამგეობას გადაეგზავნება.

შეგახსენებთ, ადიგენის მუნიციპალიტეტის სოფელ ზანავში ქრისტიანის, სოფელ ადიგენში კი მუსლიმის დასაფლავების პრობლემა შეიქმნა. ამის გამო ორივე სოფელში მუსლიმი და ქრისტიანი თემი ერთმანეთს დაუპირისპირდა. მუსლიმმა მრევლმა და მუსლიმთა სამმართველომ სოფელ ადიგენში სასაფლაოებისთვის ტერიტორიის გამოყოფის შესახებ ადგილობრივ თვიმმათველობას სწორედ ამის შემდეგ მიმართა. ადიგენის გამგეობამ კი ეს მიმართვები რელიგიის სააგენტოს გადაუგზავნა.

[თამუნა უჩიძე, ადიგენი]