რატომ ვერ მოგვარდა ადიგენის სასაფლაოს ტერიტორიის საკითხზე ფორმალური მხარე

ადიგენის მუნიციპალიტეტის სოფელ ადიგენში მუსლიმებისთვის გამოყოფილი სასაფლაოს ტერიტორია, ამ დრომდე კერძო საკუთრებაში რჩება. როგორც ამ მიწის მესაკუთრე ზაზა გახოკიძე აცხადებს, ჯერ დოკუმენტები მოსაწესრიგებელი თავად აქვს.

„მიღება–ჩაბარების აქტი მაქვს, რომ მიწა ჩემია, მაგრამ ელექტრონულად უნდა დავისაკუთრო. ამ საკითხს ალბათ ორშაბათისთვის მოვაგვარებ“, – ამბობს გახოკიძე.

მისი თქმით, ჯერ საბოლოოდ გარკვეული არც ისაა, ადიგენის მუნიციპალიტეტის გამგეობა მისგან რა ფართობს შეიძენს: „ჯერ საუბარი იყო მთელ ბაღზე, სადაც კაკლის ხეებიც ყვებოდა. ამიტომ გამგეობას ვთავაზობდი, ჩემთვის სოფელში ეყიდა ალტერნატიული ბაღი, რომელიც აქვე მეზობლად იყიდება. მერე გადაიფიქრეს იმ ადგილის შესყიდვა, სადაც ეს ხეებია და ახლა თავისუფალი მიწის ყიდვაზეა ლაპარაკი. იქ მხოლოდ ერთი კაკლის ხე რჩება“.

ადიგენის მუნიციპალიტეტის გამგეობაში აცხადებენ, რომ ვიდრე თავად მიწის მესაკუთრე არ დაისაკუთრებს ნაკვეთს, გამგეობა ამ ფართობის შესყიდვას ვერ შეძლებს: „ვიდრე ეს საკითხი არ მოგვარდება, შესყიდვის უფლება სამართლებრივად არ გვექნება. რაც შეეხება ფართობს, საუბარი 2 022 კვადრატულ მეტრზეა. ფასზე კი მას შემდეგ ვისაუბრებთ, რაც ეს მიწა გახოკიძის კერძო საკთრებაში რეგისტრირდება. ჯერ ამაზი ლაპარაკი ადრეა“.

რა შეიძლება დაუჯდეს გამგეობას აღნიშნული ფართობის შესყიდვა და რა არის დღეს კვადრატული მიწის ფასი, კონკრეტული პასუხის გაცემა ეკონომიკის სამინისტროშიც უჭირთ.

„მიწის ნორამატიულ ფასს თავად თვითმმართველბა ადგენს. როცა სამინისტროს გააქვს აუქციონზე კონკრეტული ფართობი, მისი ღირებულება სამხარაულის ექსპერტიზით დგინდება“, – აცხადებენ ეკონომიკის სამინისტროს საზოგადოებასთან ურთიერთობის სამსახურში.

მას შემდეგ რაც ფასი და საკუთრების საკითხი გაირკვევა, გამგეობა მიწის ყიდვის ნებართვას საკრებულოსგან მიიღებს.

შეგახსენებთ, რომ სოფელ ადიგენში მუსლიმებისთვის სასაფლაოს ტერიტორიის ცალკე გამოყოფა დაპირისპირების თემა გახდა. ორდღიანი კონფლიქტის შემდეგ მხარეებმა შეთანხმებას მიაღწიეს, საერთო სასაფლაო გაკეთდება და შუაში ზღვარი გაივლება. ამ ტერიტორიაზე გარდაცვლილი მუსლიმი უკვე დაკრძალეს.

[თამუნა უჩიძე, ადიგენი]