ადიგენში სასაფლაოს მიწა ჯერ ისევ კერძო საკუთრებაშია

ადიგენის მუნიციპალიტეტის სოფელ ადიგენში დღეს, 7 მარტს, მუსლიმი გოგონა დაკრძალეს. ტერიტორია, რომელიც ადგილობრივ ქრისტიანს, ზაზა გახოკიძეს ეკუთვნის, მისივე განცხადებით, ადიგენის მუნიციპალიტეტის გამგეობამ უნდა შეისყიდოს.

„მითხრეს, რომ გვერდში დამიდგებიან, მაგრამ ჯერ ეს საკითხი არ მოგვარებულა. ბუნებრივია, ამის გამო გარდაცვლილის დასაფლავების პრობლემას არ შევქმნიდი“, – ამბობს გახოკიძე.

სამცხე–ჯავახეთის მუფთი მამუკა ვაშაყმაძე აცხადებს, რომ ადიგენის მუნიციპალიტეტის გამგეობა ამ საკითხს უახლოეს დღეებში მოაგვარებს: „ველოდებით, რომ დაარეგისტრირონ“.

ადიგენის მუნიციპალიტეტის გამგეობაში შეკითხვებზე: რა ფორმით მოხდება თვითმმართველობისთვის მიწის გადაცემა, რა ეტაპზეა ამ მიმართულებით სამუშაოები, ან რა დაუჯდება თვითმმართველობას გახოკიძის მიწის შესყდივა, გვპასუხობენ: „შემჭიდროვებულ ვადებში ვცდილობთ ყველაფერი მოვაგვაროთ. სხვა კითხვებზე პასუხის გაცემას საჭიროდ არ ვთვლით“.

შეგახსენებთ, რომ სოფელ ადიგენში მუსლიმებისთვის სასაფლაოს ტერიტორიის ცალკე გამოყოფა დაპირისპირების თემა გახდა. ორდღიანი კონფლიქტის შემდეგ მხარეებმა შეთანხმებას მიაღწიეს, საერთო სასაფლაო გაკეთდება და შუაში ზღვარი გაივლება.

[თამუნა უჩიძე, ადიგენი]