სოფელი ადიგენი ორად გაიყო – მხარეებს მოლაპარაკებას სთავაზობენ

ამ დროისთვის სოფელ ადიგენში მუსლიმები მეზობელი სოფლებიდანაც მივიდნენ. აქ არიან მუსლიმური თემის წევრები სოფლებიდან: მოხე, აფიეთი, ციხისუბანი, დერცელი, ზედუბანი, ჭეჭლა, კიკიბო, ღორთუბანი და კეხოვანი.




მუსლიმური თემის წევრები გუშინდელი ინციდენტისას დაზარალებული ავთანდილ იაკობაძის სახლში არიან შეკრებილი.



ამ სახლიდან მოშორებით, ერთ–ერთი ქრისტიანის სახლში არიან შეკრებილი ადგილობრივი ქრისტიანები.






სოფელში დილიდან იმყოფებიან სამართალდამცველებიც. ადგილზე მობილიზებულია უსაფრთხოების სამსახურიც. სოფელ ადიგენში იმყოფება შსს სამცხე–ჯავახეთის პოლიციის დეპარტამენტის უფროსი თეიმურაზ კალანდაძე.




სამართალდამცველებს ამ ორ სახლს შორის ტერიტორია უკავიათ. გზა გადაკეტილი არ არის. პოლიცია ამბობს, რომ ადგილობრივების უსაფრთხოებას იცავს.



სოფელ ადიგენში იმყოფებიან ადიგენის მუნიციპალიტეტის გამგებელი ზაქარია ენდელაძე და მისი მოადგილე მინდია ჯელია.

გამგებლის თქმით, სოფელში ვითარება ფაქტობრივად მოგვარებულია: „გუშინ რაც იყო პატარა შეხლა–შემოხლა, მალე განიმუხტა, შეთანხმება მიღწეული გვაქვს ფაქტობრივად, საუბარი არის სასაფალაოს გაფართოებაზე, ვფიქორბ, რომ სოფელში ამ დროისთვის საქმე ცუდად არაა“.
ბოლო ინფორმაციით, სოფელ ადიგენში შეკრებილ მუსლიმებს მოლაპარაკებას სთავაზობენ. გამგებელი ორივე თემს ცალ–ცალკე დაელაპარაკა და შესთავაზა ორივე მხრიდან გამოიყოს სამ–სამი ადამიანი მოსალაპარაკებლად.


ადიგენის მუნიციპალიტეტის გამგებელი ზაქარია ენდელაძე

უკვე ცნობილია, რომ ქრისტიანების ინტერესებს მოლაპარაკების მაგიდასთან მამუკა ფაილოძე, ალიკა გოდერიძე და ზურაბ ტაბიძე დაიცავენ.
მუსლიმები კი ამ შეთავაზებას არ თანხმდებიან. ისინი ამბობენ, რომ მოლაპარაკებაზე თანახმა არიან, ოღონდ იმ პირობით, რომ ყველანი დაესწრებიან.

„მოვიდეს აქ გამგებელი სამ კაცთან ერთად და პირობას ვაძლევთ, რომ ჩვენგან სამ კაცზე მეტი ხმას არ ამოიღებს“, – ამბობენ მუსლიმები და ამატებენ, რომ იქამდე არ დაიშლებიან, ვიდრე სოფელში სასაფლაოს ტერიტორია არ გამოიყოფა.

შეგახსენებთ, სოფელ ადიგენში ვითარება მას შემდეგ დაიძაბა, რაც რელიგიის სააგენტომ მიიღო რეკომენდაცია სოფელში მუსლიმების სასაფლაოსთვის ტერიტორიის გამოყოფის შესახებ. ამ ინფორმაციის გავრცელების შემდეგ, გუშინ, 29 თებერვალს, ადგილობრივი მუსლიმები და ქრისტიანები ერთმანეთს დაუპირისპირდნენ. მომხდარს შინაგან საქმეთა სამინისტრო, 156–ე, დევნის მუხლით იკვლევს.




[ნინო ნარიმანიშვილი, თამუნა უჩიძე, ადიგენი]