სანდროშვილის პასუხი ”ოცნების” წევრებს

თვითმმართველობაში მიმდინარე საკადრო ცვლილებებთან დაკავშირებით ”ქართული ოცნების” აქტივისტების ნაწილმა განცხადება გუშინ გამართულ ბრიფინგზე გააკეთეს. მათ უნდობლობა გამოუცხადეს საკრებულოს თავმჯდომარეს ოლეგ სანდროშვილსა და მთელს ახალდანიშნულ ადგილობრივ ხელისუფლებას.

”მე ხმამაღლა ვაცხადებ, რომ 2005 წლიდან დღემდე ”კონსერვატიული პარტიის” წევრი ვარ და ნებისმიერი არჩევნების დროს ვიცავდი იმ პოლიტიკური პარტიის თუ კოალიციის ინტერესებს, რომელსაც წარმოვადგენდი. პოლიტიკა არ არის ის, რაც ქალბატონ ლელას ჰქონია, არჩევნებამდე ერთი თვით ადრე მოვიდა და უცებ გამარჯვების მომენტშიც აღმოჩნდა. ის არის შტაბის ხელმძღვანელის მეუღლე, იყო წარმომადგენელი საოლქო კომისიაში, სადაც დიდი აქტიურობით არ გამოირჩეოდა და არჩევნების პერიოდში აღარც კი მახსოვს იყო თუ არა სადმე ჩართული. ამიტომ ”ოცნების” სახელით მან მე ამიკრძალოს საუბარი და თვითონ ისაუბროს, ეს მიუღებელია”, - განაცხადა ოლეგ სანდროშვილმა.

საკრებულოს თავმჯდომარე ამბობს, რომ გუშინდელი შეხვედრის მონაწილეები, რამდენიმეს გამოკლებით, კოალიცია ”ქართული ოცნების” წევრები არ ყოფილან და ისინი უბრალოდ კოალიციის მხარდამჭერეები არიან. ამიტომ, მათი მხრიდან შენიშვნების მიღება შეურაცხმყოფელია.

”როდესაც ასეთ განცხადებებს აკეთებენ, უბრალოდ ვურჩევდი მათ, რომ წაიკითხონ კანონი ადგილობრივი თვითმმართველობის შესახებ, სადაც ნათქვამია რამდენი ხნით და როგორ ირჩევა საკრებულოს წევრი, რა ფუნქციები ევალება მას დ ასე შემდეგ”, - განმარტავს სანდროშვილი.

რაც შეეხება იმ განცხადებას, რომ მათ არ სურთ კონკრეტული თანამდებობები, სანდროშვილი ამბობს, რომ სწორედ ეს ადამიანები მისგან საკმაოდ მაღალ თანამდებობებზე დანიშვნას ითხოვდნენ.

”ვაცხადებ, რომ მე პოლიტიკური პარტიის წევრი ვიყავი, უპირველეს ყოვლისა ჩემი მოთხოვნა იყო, რომ ხელისუფლებაში მოვსულიყავი და შესაბამისად თუ მქონდა რაღაც თანამდებობაზე პრეტენზია, ეს გასაგებიც არის. როცა ხარ პარტიის წევრი და პარტიის წარმომადგენელი, ცხადია იბრძვი იმისთვის, რომ მოხვიდე ხელისუფლებაში, მე ამაში ცუდს ვერაფერს ვხედავ, როგორც კი მოვედი ხელისუფლებაში, მაშინვე დავიწყე ჩემი საქმიანობა”, - განმარტავს საკრებულოს თავმჯდომარე.

[თამარ თოთაძე, ახალციხე]