საკადრო ცვლილება ადგილობრივ თვითმმართველობაში

მალხაზ გიქოშვილმა გადადგომის შესახებ ახალციხის მუნიციპალიტეტის საკრებულოს დღევანდელ სხდომაზე განაცხადა. მან თანამდებობა პირადი განცხადების საფძველზე დატოვა.

დღევანდელ სხდომაზევე, ერთხმად აირჩიეს საკრებულოს ახალი თავმჯდომარე, ოლეგ სანდროშვილი, რომელიც საკრებულოს წევრი ფრაქცია ”ქართული ოცნება ახალციხიდან” იყო.

ამ ეტაპზე ახალციხის მუნიციპალიტეტის საკრებულოს შემადგენლობა სამი ფრაქციით განისაზღვრება, ”ქართული ოცნება ახალციხე”, რომელიც საკრებულოს უმრავლესობას წარმოადგენს, ”ერთიანი ნაციონალური მოძრაობა”, ფრაქცია მაჟორიტარები და რამდენიმე თავისუფალი დეპუტატი.

”6 ნოემბერს ჩემს მიერ შეტანილ იქნა შესაბამის სამანტადო კომისიაში განაცხადი ფრაქციის შექმნის შესახებ, ეს არის ”ქართული ოცნება ახალციხე”, რომელშიც თავიდან ცხრა წევრი იყო, ხოლო რამდენიმე დღეში მისი რაოდენობა 14-მდე გაიზარდა ანუ საკრებულოში მივაღწიეთ უმრავლესობას, ამ ფრაქციის თავმჯდომარე მე ვიყავი, თუმცა რადგან საკრებულოს თავმჯდომარედ გადავედი, მოხდება ფრაქციის სხდომა, სადაც აირჩევა ახალი თავმჯდომარე”, - განმარტავს ახალციხის მუნიციპალიტეტის საკრებულოს ახალი თავმჯდომარე.

ოლეგ სანდროშვილის თქმით, ქვეყნის განვითარების პროცესში ახალციხის მუნიციპალიტეტიც ჩაერთვება და მაქსიმალურად შეასრულებენ ყველა იმ დაპირებას, რომელსაც მოსახლეობას წინასაარჩევნოდ დაპირდნენ.

ახალციხის მუნიციპალიტეტის საკრებულოში ამ ეტაპზე სხვა საკადრო ცვლილება არ განხორციელებულა.

”ამ ეტაპზე ყველა თანამშრომელი, კომისიის წევრები და მათ შორის მე, საკრებულოს თავმჯდომარის მოადგილე ვრჩებით უცვლელი”, - განმარტავს მალხაზ ასპანიძე.

[თამარ თოთაძე, ახალციხე]