‘ქართულ მარშს’ სამცხეში მაჟორიტარობის კანდიდატი ეყოლება

ახალციხის საკრებულოს ყოფილი თავმჯდომარე, ოლეგ სანდროშვილი „ქართული მარში - ეროვნული მოძრაობის“ მაჟორიტარობის კანდიდატი იქნება. ამბობს, რომ პარტია მას ოფიციალურად ცესკოში ხვალ, 30 სექტემბერს დაარეგისტრირებს. კითხვაზე, რატომ „ქართული მარში“ ასე პასუხობს: „მე კონსერვატორი ვარ და კონსერვატორულ პარტიაში ვიყავი ადრე, „ოცნების“ პერიოდშიც. არის სხვა მომენტებიც მარტო ეს არა“.

მისივე თქმით, ის ფაქტი, რომ პარტია საზოგადოების ნაწილის მხრიდან ფასდება, როგორც ჰომოფობიური და ქსენოფობიური განწყობების მატარებელი, არასწორია.

„მაგას ქმნიან, რომ ეგრეთია [ჰომოფობიური და ქსენოფობიური] და ასეთი არანაირად არ არის. არანაირი ძალადობა, არანაირი ძალდატანება ვინმეზე. უბრალოდ, როცა მიდგება საქმე ეროვნული ინტერესების დაცვაზე, ქვეყნის დაცვაზე ძალაუნებურად უკვე გიხდება ისეთი მეთოდების გამოყენება, რომლებიც ფასდება სხვანაირად, პრესის, მასმედიის, ლიბერალური პარტიებისა და მათი მიმდევრების მიერ“, - ამბობს სანდროშვილი.

მაჟორიტარობის კანდიდატის თქმით, პარტიას სამცხეში წინასაარჩევნო კამპანია ჯერ არ დაუწყია, თუმცა შტაბისთვის ფართი ახალციხეში უკვე მოიძიეს და რამდენიმე დღეში აქტიურ კამპანიასაც გეგმავენ: „ავიღეთ ოფისისთვის ფართი. ახლა ველოდებით სააგიტაციო მასალას და როცა ოფიციალურად წარდგენა იქნება ჩემი კანდიდატურისა ცესკოში, ფაქტობრივად, უკვე დავიწყებ საარჩევნო კამპანიას, რგორც მაჟორიტარობის კანდიდატი“.

ოლეგ სანდროშვილი ახალციხის მუნიციპალიტეტის საკრებულოს ყოფილი თავმჯდომარეა. იგი საკრებულოში 2012 წლის საპარლამენტო არჩევნებზე გამარჯვებული კოალიციის წარმომადგენელი პარტიის -„კონსერვატორების“ წევრი იყო.

2014 წლის ადგილობრივი თვითმმართველობის არჩევნებზე იგი კენჭს „სალომე ზურაბიშვილი - საქართველოს გზიდან“ (N37/01/03 უბანზე) მაჟორიტარ დეპუტატად იყრიდა, თუმცა დამარცხდა.

[თაკო ფეიქრიშვილი]