ბრძოლა პარტიის თავმჯდომარეობისთვის

”ქართული ოცნების” აქტივისტების ნაწილი რაიონული ორგანიზაციის თავმჯდომარედ არასამთავრობო ორგანიზაცია ”ერთსულოვნება საზოაგადოების უფლებებისათვის” ახალციხის რაიონული ორგანიზაციის თავმჯდომარეს გუჯა ბიჭაშვილს ასახელებს. ”ახალციხის ბიზნეს ცენტრის” ხელმძღვანელი გოჩა ათოშვილი კი ამბობს, რომ დავალებები პარტიის ცენტრალური ოფისიდან უკვე მიიღო.

”რაიონული ორგანიზაციის თავმჯდომარეობის კანდიდატად ”ქართულმა ოცნებამ” ჩემი კანდიდატურა წარადგინა. გოჩა ათოშვილმა კანდიდატურა მოხსნა და ორშაბათს მოხდება ჩემი თავმჯდომარედ დამტკიცება”, - განაცხადა ”სამხრეთის კარიბჭესთან” სატელეფონო საუბარში ელგუჯა ბიჭაშვილმა.


გოჩა ათოშვილი აცხადებს, რომ კანდიდატურა არ მოუხსნია.

”ტყუილია! ცენტრალურმა ოფისმა წარმადგინა, მაგრამ ჯერ არ არის აქ თავმჯდომარეობაზე ლაპარაკი, ყველა შეცდომაშია შეყვანილი. მე უბრალოდ დამევალა ჩამომეყალიბებინა საინიციატივო ჯგუფი, რომელმაც უნდა დააფუძნოს პარტია და მომემზადებინა კონფერენცია”, - განმარტავს ათოშვილი და ამატებს, რომ კონფერენცია გარკვეული პირობების გამო დროებით გადაიდო და ცენტრალური ოფისიდან მითითების შემდგომ გაიმართება.

როდის დამტკიცდება ”ქართული ოცნების” რაიონული ორგანიზაციის თავმჯდომარე, გოჩა ათოშვილი ვერ აკონკრეტებს.

”კონფერენციაზე აიირჩევენ პარტიის თავმჯდომარეს. ეს იქნება სუფთა პარტიული კონფერენცია და იქ სხვა პირები არ დაესწრებიან”, - ამბობს გოჩა ათოშვილი.

[თამარ თოთაძე, ახალციხე]