”ოცნების” აქტივისტი საკრებულოს თავმჯდომარის წინააღმდეგ

”მინდა გაცნობოთ, რომ როცა მე პოლიკიტაში ჩავები, თქვენ ალბათ ოცნებაშიც არ გქონდათ პოლიტიკა. მე პოლიტიკაში 1993 წლიდან ვიყავი და თქვენგან განსხვავებით არასდროს არ ვთამაშობდი მედროვეთათვის ჩვეული თამაშით. ყოველთვის ვიყავი სამართლიანი და პრინციპული და არასდროს ვყოფილვარ მიყიდული ვითომ ოპოზიციაზე”, - პასუხობს ჩიტორელიძე საკრებულოს თავმჯდომარეს.

შეგახსენებთ, რომ 18 დეკემბერს ”ოცნების” აქტივისტებმა ბრიფინგი გამართეს, სადაც განაცხადეს, რომ საკრებულოს თავმჯდომარეს არ აქვს ”ოცნების” სახელით ლაპარაკის უფლება. ისინი ოლეგ სანდროშვილს ”ნაციონალებთან” შეკრულობაში სდებდნენ ბრალს.

ჩიტორელიძის განცხადებას საკრებულოს თავმჯდომარე მეორე დღესვე გამოეხმაურა. მან განაცხადა, რომ ლელა ჩიტორელიძე, რომელიც ”ოცნების” შტაბის ხელმძღვანელის მეუღლეა, პოლიტიკაში არჩევნებამდე ერთი თვით ადრე მივიდა, ამდენად მას არ ჰქონდა უფლება მისთვის რამე აეკრძალა.

სანდროშვილი აქტივისტების ამ ნაწილს თვითმმართველობის შესახებ კანონის გადაკითხვას ურჩევდა და აცხადებდა, რომ ისინი მაღალ თანამდებობებს ითხოვდნენ და ამიტომ აქვთ მასთან პრეტენზია.

”ჩვენ გვაქვს ღირსება და თქვენთან არაფრის სათხოვნელად არც მოვსულვართ და არც ამის შემდგომ მოვალთ. უბრალოდ, მინდა შეგახსენოთ, რომ 2009 წელს ჩვენი აქტიურობით დაფუძნდა ”ქართული აკადემიის” სამცხე-ჯავახეთის წარმომადგენლობა, რომელიც მაშინვე იქცა ადგილობრივი პოლიციის და უშიშროების სამსახურების სამიზნედ, - ასე რომ, მაშინაც ვიღებდით ხმას უსამართლობის წინააღმდეგ, როცა ვერავინ ბედავდა და არც ამის შემდეგ ვფიქრობთ დუმილს”, - აცხადებს ჩიტორელიძე.

[ნინო ნარიმანიშვილი, ახალციხე]